Ermahan Ybyraıymov pen Qaırat Nurtas jarysady
ASTANA. QazAqparat - Búgin tanymal qazaqstandyq Olımpıada chempıony Ermahan Ybyraıymov pen ánshi Qaırat Nurtas Asyq atýdan respýblıkalyq týrnırge qatysady, dep habarlaıdy Ulttyq sport túrleri federatsııasynyń baspasóz qyzmetine silteme jasaǵan kazsporttv.kz.
Jarys 25 mamyrda Astanadaǵy L.Gýmılev atyndaǵy Eýrazııa Ulttyq ýnıversıtetiniń sport kesheninde ótedi. Shaqyrylǵan qonaqtardyń arasynda «Nur Otan» partııasy tóraǵasynyń birinshi orynbasary Baýyrjan Baıbek, L.Gýmılev atyndaǵy Eýrazııa Ulttyq ýnıversıtetiniń rektory Erlan Sydyqov, qoǵam qaıratkeri Qoıshyǵara Salǵarın bar. Sonymen qatar, ánshiler Qydyráli Bolmanov pen Dosymjan Tańatarov kórsetilimdi týrnırde baq synaıdy. Asyq atýdan respýblıkalyq chempıonatqa elimizdiń barlyq óńiriniń komandalary qatysady. Ár komandada úsh adamnan bolýy kerek. Bireýiniń jasy 16-ǵa tolmaǵan, ekinshisi - 16-dan joǵary, al úshinshisi - jattyqtyrýshy. Birinshi oryn alǵan komandaǵa 300 myń teńge, ekinshi orynǵa 200 myń teńge jáne úshinshi orynǵa 100 myń teńge beriledi.
