Ermahan Ybyraıymov Golovkınge qandaı keńes berdi
ASTANA. QazAqparat - Sochıde ótken Halyqaralyq boks forýmy kezinde Olımpıada chempıony Ermahan Ybyraıymov óz shákirti Gennadıı Golovkınmen kezdesip, Alvareske qarsy aldaǵy jekpe-jekke qatysty óz aqyl-keńesin aıtty, dep habarlaıdy QazAqparat tilshisi.
«Gennadıı Sochıge Amerıkadan ushyp keldi. Men Almatydan bardym. Sol jerde ekeýimiz kezdestik. Men onymen jaqsylap turyp sóılestim. Alvareske qarsy jekpe-jek boıynsha óz aqyl-keńesimdi berdim. Men aıttym, besinshi raýndqa deıin Alvaresti jan-jaqty zerttep alý qajet. Onyń ázirlep qoıǵan qandaı ádis-tásilderi bar? Sonyń bárin zerttep shyǵý qajet. Oǵan bir raýnd jetkiliksiz. Eki raýnd ta az bolady. Bes raýnd sen ony zertteýiń kereksiń dedim. Sosyn únemi qysym jasap otyrý qajet», - dedi E.Ybyraıymov QazAqparat tilshisine bergen suhbatynda.
Óz sózinde Ermahan Saǵıuly 2001-2004 jyldar aralyǵynda Gennadıı Golovkınniń daıyndyǵyna atsalysqanyn da eske aldy. Sol kezde GGG álem chempıony boldy, Olımpıadanyń kúmis júldegeri atandy.
«Sondyqtan men oǵan kádimgideı tapsyrma berdim. Alvaresti barynsha sharshatý qajet. Sodan keıin aıttym, ózińniń qatty soǵatyn oń qolyńmen kóp ura berme dedim. Urǵan sııaqty bolyp, oń qolyńdy kórsetip, sol qolyńmen qatty soqqy jasaýǵa tyrys dep keńes berdim. Sebebi Golovkınniń sol qolmen uratyn djebi de, hýky da qatty. Sosyn jyldamdyqty kóbeıtý kerek. Óıtkeni alǵashqy jekpe-jekte Gennadıı jyldamdyq jaǵynan biraz qalyp qoıyp otyrdy», - dep atap kórsetti E.Ybyraıymov.
