Ermahan Ybyraıymov: Gennadıı Golovkın 5-shi raýndta jeńiske jetedi
ASTANA. QazAqparat - Sıdneı Olımpıadasynyń chempıony Ermahan Ybyraıymov Golovkın-Ýeıd jekpe-jegine qatysty jasaǵan boljamymen bólisti, dep habarlaıdy «Qazaqstan» ulttyq arnasy.
WBA (Super), IBO, WBC (Interim) jáne IBF nusqalary boıynsha orta salmaqtaǵy Álem chempıony, qazaqstandyq Gennadıı Golovkın (34-0, 31 KO) 23 sáýir kúni (Astana ýaqytymen 24 sáýir) amerıkalyq boksshy Domınık Ýeıdke (18-0, 12 KO) qarsy jekpe-jekke shyǵady.
Sıdneı Olımpıadasynyń chempıony Ermahan Ybraıymov Golovkın-Ýeıd jekpe-jegine qatysty jasaǵan boljamymen bólisti.
«Gennadıı Golovkın amerıkalyq boksshy Domınık Ýeıdke qarsy jekpe-jektiń besinshi raýndynda jeńiske jetedi. Qarsylasynyń uzaqqa shydaı qoıýy ekitalaı. Jalpy, meniń Ýeıdke qatysty pikirim ekiushty. Bir jaǵynan, Ýeıd - bizdiń boksshymyzǵa laıyq qarsylas emes. Qazirgi tańda Gennadıımen teń urysýǵa tórt-aq boksshynyń shamasy keledi. Olar - Saýl Alvares, Floıd Meıvezer, Sergeı Kovalev jáne Dmıtrıı Pırog.
Al, Ýeıdke Genanyń deńgeıine jetý úshin áli ósý qajet. Ekinshi jaǵynan, Gennadıı sekildi álemdegi úzdik boksshylardyń birine qarsy shyǵýdan júreksinbeýi - Ýeıdtiń de batyl jigit ekenin kórsetedi. Sol úshin de ony Genaǵa laıyqty qarsylas dep esepteýge bolatyn shyǵar...», - deıdi E.Ybraıymov.
Aıta keteıik, jekpe-jekti 24 sáýirde 07:20-dan bastap «Qazaqstan» Ulttyq telearnasy men kaztrk.kz saıty tikeleı efırde kórsetedi. «Qazmedıa Ortalyǵynyń» led-ekrandarynan tamashalaı alý múmkindikterińiz bar.
