Ermahan Ybraıymov: 2016 jylǵy Olımpıadada Qazaqstan boksshylarynyń 4 medal alýǵa múmkindigi bar
ASTANA. QazAqparat - Rıo-de-Janeıroda Qazaqstannyń eki «altyn» alýǵa tolyq múmkindigi bar. Búgin «Bokstan olımpıadalyq daıarlaý ortalyǵy» Respýblıkalyq memlekettik-qazynalyq kásiporyn dırektory Ermahan Ybyraıymov osyndaı pikir bildirdi.
«Olımpıada oıyndarynda komanda kapıtany Danııar Eleýsinov «altyn» úmittimiz, Al odan basqa Jánibek Álimhanuly, Ádilbek Nııazymbetov, Ivan Dychko bar, sondaı-aq 64 keli salmaqta qazir jastar arasynda shyqqan Abylaıhan Júsipov te óner kórsetse, elimiz enshisine biraz medal túsedi degen oıdamyn. Sondyqtan aldymyzda Rıoda ótetin Olımpıadada Qazaqstan boksy ózderiniń jankúıerlerin «altyn» medaldarmen qýantatyn bolady»,-dedi ol QR Mádenıet jáne sport mınıstrliginiń alqa májilisinen keıin QazAqparat tilshisiniń saýalyna jaýap berý kezinde.
E. Ybraıymovtyń paıymynsha, 2016 jylǵy aıtýly dodada boksshylarymyzdyń kem degende 4 medal alýǵa múmkindigi bar.
«Olımpıada ońaıǵa túspeıtinin bilesizder, biraq 1-2 «altyn» alýǵa Qazaqstannyń tolyq múmkindigi bar»,-dedi ol.
