Ermahan Shaıhyulynyń «Aqqýdyń syńary» kitabynyń tusaýkeseri ótti
ALMATY. 23 jeltoqsan. QazAqparat /Názıra Eleýhan/ - Almatyda Qazaqstan Jazýshylar jáne Jýrnalıster odaǵynyń múshesi, Balǵabek Qydyrbekuly atyndaǵy syılyqtyń eki márte ıegeri, Respýblıkalyq qoǵamdyq-saıası «Aıqyn» gazeti bas redaktorynyń orynbasary Ermahan Shaıhyulynyń «Aqqýdyń syńary» atty kitabynyń tusaýkeseri ótti.
Kitaptyń tusaýkeserine Nurǵısa Tilendıevtiń jary Darıǵa Tilendikelini, Qalıjan Bekhojınniń zaıyby Zaıda Janaıqyzy, Tólegen Aıbergenovtyń qyzy Saltanat Aıbergenova jáne taǵy da basqa kitaptyń basty keıipkerleri bolǵan tulǵalardyń týǵan-týystary men jubaılary, sondaı-aq, elimizge tanymal aqyn-jazýshylar, ýnıversıtet oqytýshylary men stýdentteri qatysty.
«Bul kitap qazaq rýhanııatynda erekshe orynǵa ıe bolary sózsiz. Kitap ishindegi jazbalar birin-biri qaıtalamaıdy. Bul kitap keshegi 50-60-shy jyldary qazaq rýhanı áleminde jarq etip kóringen alyptarymyzdyń ómirbaıandarynan naqty estelikter beredi. Kitap sonysymen qundy»,- dep atap ótti tusaýkeser barysynda ál-Farabı atyndaǵy QazUÝ fıloloııa, ádebıettaný jáne álem tilderi fakýltetiniń dekany, professor Qanseıit Ábdezuly.
Kitaptyń shyǵýyna muryndyq bolǵan «Atamura» korporatsııasynyń prezıdenti, Qazaqstannyń eńbek sińirgen qaıratkeri Raqymǵalı Qul-Muhammedtiń aıtýynsha: "Kitap Qalıjan Bekhojın, Nurǵısa Tilendıev, Táken Álimqulov, Jarasqan Ábdirash, Bekseıit Túlkıev sııaqty qazaqtyń birneshe kórnekti aqyn-jazýshylary men ánshi-sazgerleriniń, sýretshiler men sport sheberleriniń sondaı-aq, óner qaıratkerleriniń artynda qalǵan aıaýly jarlary ózderiniń ómirlik serigi bolǵan jubaılary týraly syr shertýimen erekshe. Bizge bul týyndy sol aǵa býynnyń artyqshylyǵyn, jaqsy qasıetterin baıandaıdy",-dedi.
El Táýelsizdiginiń 20 jyldyq merekesine oraı «Atamura» baspasynan jaryq kórgen bul jınaqta qalamgerdiń 2004-2011 jyldar aralyǵynda «Aıqyn» gazetinde «Aqqýdyń syńary», «Jaqsynyń kózi» aıdarlary boıynsha jaryq kórgen syr-suhbattary men maqalalary toptastyrylǵan.
