Erlik Sertaı: Komandalyq rýh — jeńisimizdiń basty syry
NAGOıA. KAZINFORM — Semserlesýden Qazaqstan erler quramasy taǵyda tarıhı nátıje tirkedi. Otandastarymyz búgin Japonııadaǵy jazǵy Azııa oıyndarynda shpagadan komandalyq básekede top jardy. Jarystan keıin, komanda múshesi Erlik Sertaı Kazinform tilshisine az-kem suhbat berip, jarysty qortyndylady.
Qazaqstandyq sportshy aqtyq báseke óte shıelenisti ótkenin aıtty.
— Bapkerdiń taktıkasy boıynsha qarsylastan bir-eki upaı alǵa ozyp, qorǵanysta bolamyz dep josparlanǵan edi. Alaıda koreıalyqtar birden shabýyldap, alǵa ketip qaldy. Barlyǵymyz esepti qýyp jetý kerek ekenin jaqsy túsindik. Sol sebepti taktıkada ózgerister boldy. Sońǵy úsh raýndta komandamyz nátıjeli oıyn kórsetti, — dedi ol.
Erlik Sartaıdyń aıtýynsha, osyndaı tarıhı jeńistiń artynda úzdiksiz eńbek jáne komandalyq yntymaq jatyr.
— Biz jeńis úshin árqashan alǵa umtylamyz jáne sol úshin úzdiksiz eńbek etip, jattyǵý jasaımyz. Jarys barysynda komandalastarymnyń qoldaýy erekshe boldy. Biz ár qashan bir-birimizdi jalǵyz qaldyrmaımyz. Menińshe, komandalyq rýh — bizdiń jeńiske jetýimizdiń basty syry, — dedi sportshy.
Qazaqstandyq semserlesýshi bas qarsylastary týraly pikir bildirdi.
— Qazirgi ýaqytta álemdik reıtıngide úshinshi orynda kele jatyrmyz. Búgin biz Ońtústik Koreıany jeńdik, olardan bir upaıǵa ǵana myqty boldyq. Sol sebepti bul sportta ońaı qarsylas joq, báseke ár qashanda óte joǵary deńgeıde. Arqany keńge salýǵa bolmaıdy. Árbir jarys, ár jeńis mańyzdy, — dep atap ótti sportshy.
Erlik Sartaı aldaǵy negizgi jospar Olımpıadaǵa daıyndyq ekenin aıtty. Sonymen qatar ol bapkerdiń eńbegin aıryqsha joǵary baǵalady.
— Alda Olımpıada oıyndaryna daıyndyq bastalady. Jattyǵýda ózimizdi jaqsylap daıyndap, deńgeıdi kóterýge mán beremiz. Olımpıadaǵa kúshti bolyp barýymyz kerek. Osy jolda bapkerimiz Aleksandr Gorbachýk komandanyń jetistigine úlken úles qosty. Jattyǵýdaǵy taktıkalar bizdiń tehnıkalyq deńgeıimizdiń kóterilýine septigin tıgizdi, — dedi sportshy.
Eske sala keteıik, semserlesýden Qazaqstan erler quramasy Japonııada ótip jatqan HH jazǵy Azııa oıyndarynyń chempıony atandy.
Qazaqstan quramasy maýsym aıynda Úndistannyń Delı qalasynda ótken Azııa chempıonatynda top jardy.
Odan keıin otandastarymyz Gonkong qalasynda ótken Álem chempıonatynda taǵy top jaryp, tarıhı nátıje tirkedi.
