Erlik pen eńbek egiz uǵym: Naǵı Іlııasovtyń ómir joly týraly urpaqtar esteligi
ASTANA. KAZINFORM – Uly Jeńistiń 81 jyldyǵy qarsańynda maıdanda erlik kórsetip qana qoımaı, beıbit ómirde de el damýyna ólsheýsiz úles qosqan tulǵalardy eske alý — urpaq paryzy. Sondaı azamattardyń biri — Keńes Odaǵynyń Batyry Naǵı Іlııasov.
Batyrdyń nemeresi tehnıka ǵylymdarynyń kandıdaty, qaýymdastyrylǵan professor, polkovnık Begim-Murat Іlııasov Jibek Joly telearnasyna suhbat berdi.
Stalıngrad maıdanynan bastalǵan jaýyngerlik jol, Dýnaıdy keship ótken surapyl shaıqastar, Býdapesht pen Vena úshin urystar, Máskeýdegi Jeńis parady — munyń bári Naǵı Іlııasov ómiriniń dańqty betteri.
Al soǵystan keıin ol elge oralyp, aýyl sharýashylyǵy salasyn kóterýge bar kúsh-jigerin arnady. Basshylyq etken sovhozdaryn respýblıkadaǵy aldyńǵy qatarly sharýashylyqtardyń birine aınaldyryp, beıbit eńbekte de úlken abyroıǵa ıe boldy.
– Bizdiń atamyz asharshylyqtan bastap, ótken ǵasyrdyń túrli náýbetterin bastan keshti. Arys jáne Tashkenttegi balalar úıinde tárbıelenip, Tashkent pedýchışılesin bitirgen. Onyń bilimge qushtarlyǵy ózinen taraǵan bes perzentke darydy deýge bolady. Balalary pedagogıka, hımııa, tehnıka, dıplomatııa salalarynda eńbek etti. Men atamnyń tuńǵysh nemeresimin jáne áskerı qyzmetshi bolamyn dep oılamadym. 1994 jyly joǵary oqý ornyn aıaqtap, 1995 jyly ásker qataryna shaqyryldym. Bul elimiz egemendik alyp, kadrlar jetispeı jatqan kez. Sonda maǵan áskerı qyzmette qalýdy usynyp, qazir polkovnık shenine deıin jettim, – dedi B. Іlııasov Jibek Joly telearnasynyń «BÚGІN.Live» baǵdarlamasynda.
Spıker óz atasynyń qarapaıym, ashyq, baýyrmal bolǵanyn aıtady. Soǵys týraly kóp aıta qoımaıtyn, degenmen merekelik sherýlerge qatysatyn.
– Meniń atam 1942 jyly 22 jasynda maıdanǵa attandy. Dýnaıdy keship ótken mańyzdy operatsııada artıllerııa barlaýshysy bolǵan. Sondaǵy erligi úshin 1945 jyly 25 jasynda Keńes Odaǵynyń batyry atanǵan. Bul oqıǵa týraly derekter jetkilikti. Ózim de qazir Ulttyq Qorǵanys ýnıversıetinde oqý-ádisteme bóliminiń basshysymyn. Munda ofıtserlerdi magıstratýrada oqytamyz jáne atalarymyzdyń erligi men otansúıgishtigin eske salyp otyramyz. Áskerılerdiń basty mindeti – soǵysý emes, soǵysqa jetkizbeý ekenin basa aıtamyz, – deıdi B. Іlııasov.
Naǵı Іlııasovtyń kópshilik bile bermeıtin taǵy bir erligi – soǵystan keıingi qıraǵan ekonomıkany kóterýi, aýyl sharýashyly salasyn damytýy. Qazirgi ýaqytta Qyzylorda oblysyndaǵy Naǵı Іlııasov aýyly elimizdegi eń úzdik týrıstik aýyl atanyp otyr.
– Soǵystan keıin atam partııanyń túrli qyzmetterin atqardy, sovhoz dırektory boldy. Alpysynshy jyldary jańa aýyldyń boı kóterýi úshin eńbektendi, jańa úıler, balabaqshalar, mektepter, klýbtar salyp, aǵash ekti jáne sol jyldary-aq kórkeıgen úzdik aýyldardyń qatarynan kórindi. Sol kezdegi ǵylym men agrotehnıka jetistigin barynsha qoldanyp, kúrish fabrıkasyn iske qosty. Mundaı jetistikterge jetýge onyń temirdeı tártibi men eńbekqorlyǵy yqpal etti. Qaramaǵynda túrli halyq ókilderi jumys istedi, adamdarmen til tabysa alý men uıymdastyrýshylyq qasıetteri de kómektesti. Oǵan qosa, qarapaıymdylyǵy, maqsatqa jetetin tabandylyǵy da urpaqtaryna úlgi bolyp qala beredi, – deıdi spıker.
Buǵan deıin Berlındegi ratýshaǵa alǵashqylardyń biri bolyp kirgen qaısar maıdanger, memlekettik qaýipsizdik salasynda qyzmet etken ofıtser, Halyq qaharmany Kenjebaı Mádenov týraly urpaqtar esteligin jarııalaǵan edik.
