Erlikpen qaza tapqan tarazdyq polıtseıdiń otbasyna 3 bólmeli páter berildi

TARAZ. QazAqparat – QR Prezıdenti Qasym-Jomart Toqaevtyń Jarlyǵymen jappaı tártipsizdik kezinde qaza tapqan polıtseıler men áskerıler memlekettik nagradalarmen marapattalǵan bolatyn. Sol búlikte erlikpen kóz jumǵan batyrlardyń biri Taraz qalalyq polıtsııa basqarmasy 1-bóliminiń ýchaskelik ınspektory, polıtsııa kapıtany Rahat Slanbekov, dep habarlaıdy QazAqparat tilshisi.

Memleket basshysynyń tapsyrmasyna sáıkes oblys ákimi Berdibek Saparbaev ІІ dárejeli «Aıbyn» ordenin marqumnyń anasyna tabys etti. Sondaı-aq artynda jary, bes ul-qyzy qalǵan batyrdyń otbasyna 3 bólmeli páterdiń kilti berildi.

QR Ulttyq ulannyń 5513 áskerı bóliminde ótken sharaǵa Rahat Slanbekovtiń otbasy, týǵan-týystary men áriptesteri qatysty. Olar marqumdy bir mınýt únsizdikpen eske aldy.
Aımaq basshysy syn saǵatta erlik tanytqan Rahattyń esimi el jadynda máńgi saqtalatynyn atap ótti.

«Memleket basshysy Qasym-Jomart Toqaev el tynyshtyǵyn kúzetý jolynda, qaskóılerge qarsy kúreste opat bolǵan batyrlardy túrli memlekettik nagradalarmen marapattap, laıyqty qurmet, otbasylaryna qajetti kómekter kórsetýdi tapsyrǵan bolatyn.

Búlikshilerdiń qolynan qaza tapqan Rahattyń erligi men órligi óziniń áriptesterine, keıingi jas urpaqqa úlgi-ónege. Ol qyzmettik mindetin abyroıly, adal atqara otyryp, óziniń naǵyz patrıot, eljandy er azamat ekenin dáleldep ketti. Eldiń amandyǵy, beıbit turǵyndardyń tynyshtyǵy jolynda ózin qurban etti. Rahat sekildi batyr ulandardyń esimin eli eshqashan umytpaıdy.

Arystaı azamattyń qazasy bárimizge aýyr tıdi. Otbasy men jaqyn týystaryna qaıǵyra kóńil aıtamyz. Artynda qalǵan ul-qyzdaryna tek jaqsylylyq, uzaq ǵumyr tileımiz», - dedi oblys ákimi B.Saparbaev.

Aımaq basshysy týǵan jerin, qalasyn qorǵaý kezinde kóz jumǵan áskerılerdiń, polıtsııa men qaýipsizdik salasy qyzmetkerleriniń otbasylaryn memleket tarapynan qoldaý sharalary jalǵasatynyn, jergilikti ákimdik te árkez kómektesýge ázir ekendigin jetkizdi.

Óz kezeginde Rahattyń anasy Ulbosyn Japarova Otan úshin opat bolǵan ulynyń qazasyna kóptiń ortaqtasqanyna, erligi eskerýsiz qalmaı, Memlekettik nagradamen marapattalǵanyna yqylasyn bildirip, eldiń amandyǵyn tiledi.