Erlikpen qaza tapqan Shalqar Aqymǵalıevtyń otbasyna III dárejeli «Aıbyn» ordeni berildi
Qyzmet babynda qaza bolǵan polıtseıdiń anasy Lázzat Májenqyzyna memlekettik nagradany búgin oblys ákimi Nurlan Noǵaev tabys etti.
Sondaı-aq, óńir basshysy Otan qorǵaýshylar kúnine oraı ótken sharada oblys polıtseıleri ózderine mindettelgen tapsyrmalardy joǵary dárejede atqaryp kele jatqanyn jetkizdi.
Sharada, sondaı-aq, senat depýtaty Baqtyqoja Іzmuhambetov, general-leıtenant Abaı Tasbolatov sóz alyp, jınalǵandardy quttyqtady.
Merekege oraı Prezıdent jáne ІІM, sondaı-aq, oblys ákimderiniń memlekettik nagradalary men alǵys hattary tabys etilgen soń sala ardagerleri bastap departamenttegi memorıalǵa arnaıy jasaqtap qoıylǵan eskertkish taqtasyna bet aldy.
Saltanatty ashylý rásimi oblys ákimi Nurlan Noǵaev pen polıtsııa departmentiniń bastyǵy general-maıor Aıan Dúısembaevtyń qatysýymen ótti. Taqtaǵa táýelsizdik jyldarynda qylmyspen kúreste, azamattardyń ómirin qorǵaý jolynda janyn qıǵan 3 polıtsııa qyzmetkeriniń fotosýreti men esimderi oıyp jazylǵan.
Olar 1993 jyly qylmyskerlerdi quryqtaý barysynda qaza bolǵan jedel ýákil polıtsııa aǵa leıtenanty Bısekenov Asqar Túsipuly, 2009 jyly qyzmet kezinde mas júrgizýshi avtokólikpen qaǵyp oqıǵa ornynda mert bolǵan Ótemisov Nurbergen Sısenbaıuly jáne bıyl naýryz aıynda kópirden sekirgen azamatshany sýdan qutqarý kezinde mert bolǵan Aqymǵalıev Shalqar Kóshkinbaıuly.
Eskertkish taqtanyń ashylý saltanatyna oraı sóz sóılegen Asqar Bısekenovtyń anasy Sara Musaǵalıeva ishki ister organdarynyń qyzmetreleriniń eńbegin joǵary baǵalap, erlikti ulyqtaǵan jandarǵa alǵysyn jetkizdi.
Batyrlardyń qurmetine bir mınýt únsizdik jarııalanyp aspanǵa oq atyldy. Sap túzegen ishki ister organdarynyń qyzmetkerleri memorıl aldyna gúl shoqtaryn qoıdy.
Aıta ketelik, Atyraý polıtsııasy tarıhynda qyzmettik mindetterin minsiz atqaryp, azamattardyń ómirin qorǵaýǵa atsalysqan 6 qyzmetker «Erligi úshin» medalimen, 4 qyzmetker «Aıbyn» ordenimen marapattalǵan.
