Erlykaıa: Túrkııadaǵy zańsyz narazylyqtar kezinde 123 polıtsııa qyzmetkeri jaralandy

ASTANA. KAZINFORM – Túrkııada sońǵy kúnderi keıbir toptar jınalys pen sherý ótkizý quqyǵyn asyra paıdalanyp, polıtsııa qyzmetkerlerine shabýyl jasap, azamattardyń qaýipsizdigin buzyp, qoǵamdyq tártipke qaıshy árekettendi. Túrkııanyń ishki ister mınıstri Alı Erlykaıa «X» áleýmettik jelisindegi paraqshasynda osylaı jazdy, dep habarlaıdy Report.

Onyń aıtýynsha, 2025 jyldyń 19-23 naýryzy aralyǵyndaǵy zańsyz narazylyqtar kezinde 123 polıtsııa qyzmetkeri jaraqat alǵan.

Ol polıtsııa qyzmetkerlerine shabýyl jasaǵan, memleket múlkine zııan keltirgen jáne azamattardyń qaýipsizdigine qaýip tóndiretin 1133 kúdikti ustalǵanyn atap ótti. Ustalǵandar arasynda 12 túrli terrorıstik uıymmen baılanysy bar tulǵalar da bar.

Erlykaıa jerlesterin tártipti saqtaýǵa, saqtyqqa, parasattylyqpen áreket etýge shaqyrdy.

Aıta keteıik, Túrkııadaǵy narazylyqqa baılanysty Qazaqstannyń Túrkııadaǵy elshiligi málimdeme jasady.