Erlik jasaǵan polıtseı: Elordada gazdan ýlanǵan turǵyndy qutqarýdyń mán-jaıy belgili boldy
NUR-SULTAN. QazAqparat – Bıyl 4 sáýirde elordadaǵy turǵyn úılerdiń birinde gazdyń taralýy oqıǵasy oryn aldy. Polıtsııa aǵa leıtenanty Azamat Ótegenov turǵyndardy shuǵyl túrde aýlaǵa shyǵaryp, es-tússiz jatqan qyzdy páterdiń terezesinen alyp shyǵyp qutqardy. Bul oqıǵanyń mán-jaıyn ol «QazAqparat» tilshisine aıtyp berdi.
«Turǵyn úıdiń kireberisinde gazdyń ıisi shyǵyp jatqany týraly málimet kelip tústi. Oqıǵa ornyna jetken boıda, shynymen de páterdiń birinen gazdyń ıisi taralyp jatqanyn baıqadym. Osydan keıin ózge turǵyndardy páterlerinen shyǵarýdy bastap, gaz júıesin ajyratý úshin gaz qyzmetine telefon shaldym. Sonymen qatar, dereý atalǵan páterge tereze arqyly kirý múmkindindigin qarastyra bastadym», - dedi A. Ótegenov.
Osydan keıin oqıǵa ornyna kelgen patrýldik kólikten qajetti quraldardy alyp, polıtsııa qyzmetkeri tereze aldyna ornatylǵan temir tordy buzyp, páterge kirdi
«Páterdiń ishinde tynysy tarylyp, gazdan tunshyǵyp jatqan qyzdy kózim shaldy. Ony aýlaǵa alyp shyǵyp, alǵashqy medıtsınalyq kómek kórsettim. Jalpy, alǵashqy kómek kórsetý áreketteri qyzmettik tájirıbemizde jıi kezdesedi. Osyǵan deıin dárigerlerdiń qalaı kómek kórsetetinin birneshe márte kórgen edim. Jedel járdem kelgenge deıin atalǵan qyz esin jıyp, tynys alýy qalpyna keldi», - dedi polıtseı.
Osy oqıǵadan keıin polıtseı zardap shekken qyzdyń týystarymen baılanysqa shyǵyp, onyń hal-jaǵdaıyn surap turǵan.
Qazirgi kezde Azamat Ótegenov qala kóshelerin patrýldeýmen aınalysady.
«Óz qyzmetimde turǵyndardyń ótinishin barynsha qanaǵattandyrýǵa tyrysamyn. Áskerden kelgennen keıin, polıtsııaǵa jumysqa ornalasýǵa talpyndym. Meniń jaqyn týystarym polıtsııada qyzmet etti, balalyq shaǵymnan olardy úlgi tuttym. Bireýdiń kóz jasyna erik berip, qınalyp turǵanyn kórsem, osy sátte adamǵa kómek kórsetý mindet dep bilemin», - dedi polıtseı.
