«Erlik sabaqtaryn» ótkizý úshin úgit poıyzy saparǵa attandy
ASTANA. 28 naýryz. QazAqparat - Keshe «Almaty-2» stansysynan Qazaqstan Respýblıkasy Qarýly Kúshteriniń 20 jyldyǵy merekesine arnalǵan úgit poıyzy eldi mekenderdi aralaýǵa attanyp ketti.
QR Qorǵanys mınıstrliginiń málimetinshe, úgit poıyzyn shyǵaryp salýdyń saltanatty rásimine Qazaqstan armııasynyń áskerı qyzmetshileri, desantshy-jaýyngerler, áskerı oqý oryndarynyń kýrsanttary, sondaı-aq almatylyqtar men qalada oqıtyn stýdentter, mektep oqýshylary qatysty.
QR QK Qurlyq áskerleri Aeroutqyr áskerleri qolbasshysynyń birinshi orynbasary - shtab bastyǵy general-maıor Dáýlet Ospanov saltanatty mıtıngide sóz sóılep, oǵan qatysýshylar men saparǵa attanýshylardy aldaǵy mereıli merekemen quttyqtap, sát sapar tiledi. Munan keıin polkovnık Amankeldi Ibraev jetekshilik etetin úgit poıyzynyń jeke quramy orkestrdiń áýenimen jolǵa shyqty.
Temir jol boıymen úgitshiler Otar, Shymkent, Taraz, Saryshaǵan, Qaraǵandy, Taraz, Semeı, Óskemen, Aıagóz, Saryózek, Qapshaǵaı qalalaryn aralap, eń sońynda Almatyǵa qaıtyp oralady.
Úgit poıyzynyń 25 kúndik jumysy barysynda eldi mekenderdegi halyqpen kezdesýler ótkizý, Qazaqstan armııasynyń ardagerlerine qurmet kórsetý, QR QM Ortalyq ansambliniń shyǵarmashylyq ujymynyń jáne Qarýly Kúshter túrleriniń kontserttik baǵdarlamasyn elge tanytý, sondaı-aq mektepterde, kolledjderde, oqý oryndarynda «Erlik sabaqtaryn» ótkizý josparlanǵan.
