Erlik eshqashan umytylmaıdy: Máýlen Áshimbaev ardagerlerdi quttyqtady
Baspasóz málimetterine qaraǵanda, atalmysh aıasynda Ekinshi dúnıejúzilik soǵys kezinde eren erligimen kózge túsip, eń joǵary nagrada - Keńes Odaǵynyń Batyry ataǵyna usynylǵan, degenmen túrli sebepterge baılanysty sol marapatqa qol jetkize almaǵan otandastarymyzǵa qurmet kórsetilmek.
Búgin partııa Tóraǵasynyń Birinshi orynbasary Máýlen Áshimbaev Astana qalasynda osyndaı ardagerlerdiń biriniń shańyraǵyna arnaıy baryp, onyń urpaqtarymen kezdesti. Jalpy zulmat jyldarda Otan úshin otqa túsip, batyr ataǵyna usynylǵandardyń bári birdeı tıisti nagradasyn ala almaǵany belgili. Qazaqstan boıynsha ondaı ardagerlerdiń qatary 100-den asyp jyǵylady. Osy taqyrypta aýqymdy zertteý jumystaryn júrgizgen belgili qoǵam qaıratkeri, «Kıeli Qazaqstan» ǵylymı-zertteý ortalyǵynyń jetekshisi Berik Ábdiǵalıulynyń aıtýynsha, olardyń nagradaǵa usynylǵanyn dáleldeıtin marapat paraqtary kúni búginge deıin saqtalǵan.
Esimi el esinde máńgi saqtalǵan osyndaı batyr atalarymyzdyń biri Amansha Jumashuly Meńdiǵalıev. Ol áıgili Panfılov dıvızııasynyń quramynda Máskeý túbindegi qııan-keski urysqa qatysqan. Aýyr jaraqatyna qaramastan 362-shi ózdiginen júretin artıllerııa polkin bastap Berlınge deıin jetedi. Sol jerde Amansha atamyzdyń batareıasy jaý áskerine oısyrata soqqy berip, nátıjesinde Keńes áskeri Germanııa astanasynyń shyǵys bóligine basyp kirýge múmkindik alady. Osy erligi úshin ol birden Keńes Odaǵynyń Batyry ataǵyna usynyldy.
Alaıda sol bir altyn juldyzǵa qol jetkize almaı ketti. Biraq erlik eshqashan umytylmaıdy. Táýelsizdik alǵannan keıin Elbasynyń Jarlyǵymen Amansha Meńdiǵalıevke «Otan» ordeni saltanatty jaǵdaıda tabys etildi. Jeti bala tárbıelep ósirgen ardager atamyz 28 nemere súıdi. Amansha ata 2008 jyly 90 jasynda dúnıeden ozdy.
Búginde batyrdyń otyn óshirmeı, qarashańyraqta uly Asylbek Meńdiǵalıev otyr. Ol da áke jolyn jalǵap, áskerı ómirdi tańdaǵan. Mereke kúni Amansha atanyń shańyraǵyna arnaıy at basyn burǵan «Nur Otan» partııasy Tóraǵasynyń Birinshi orynbasary batyrdyń urpaqtarymen kezdesip, olarǵa qurmet kórsetti. Óz sózinde ol nurotandyqtar jańa bastama arqyly tarıhı ádilettilikti qalpyna keltirip, ardagerlerdiń ózderi kóre almaı ketken marapat pen qurmetti búgingi urpaqtaryna kórsetý arqyly jastardy otansúıgishtikke baýlýdy kózdeıtinin jetkizdi.
«Biz adamzat tarıhyndaǵy eń qanquıly soǵysta qazaqstandyqtardyń Uly Jeńisti jaqyndatýǵa ólsheýsiz úles qosqanyn eshqashan umytpaýymyz kerek. Sondyqtan «Erlik eshqashan umytylmaıdy» atty arnaıy aktsııany qolǵa alyp otyrmyz. Búgin osy bastama aıasynda nurotandyqtar elimiz boıynsha qaıtpas qaısarlyqtyń jarqyn úlgisin kórsetse de ózine tıesili batyr ataǵyn ala almaı ketken ardagerlerdiń shańyraqtaryna arnaıy baryp, olardyń urpaqtaryna qurmet kórsetýde. Partııa tarapynan osyndaı ardagerlerdiń esimderin mektepter men kóshelerge berýge qatysty da tıisti jumystar júrgiziletin bolady. Buny óskeleń urpaqqa eren erlikti dáripteıtin ıgi is dep esepteımin. Sondyqtan bizder óz batyrlarymyzdyń erlikterin máńgilik jadymyzda saqtap, olarǵa laıyqty qurmet kórsetýge tıispiz», - dedi Máýlen Áshimbaev.
Ótken merekelik kúnderde «Erlik eshqashan umytylmaıdy» aktsııasy aıasynda nurotandyqtar elimiz boıynsha 8 ardagerdiń otbasyna arnaıy baryp, olardyń urpaqtarymen kezdesti. Amansha Meńdiǵalıevpen birge bul qatarda atyraýlyq Jámılá Jumasheva, shyǵysqazaqstandyq Baltabek Jetpisbaeva, tarazdyq Ibraım Súleımenov, qostanaılyq Qasym Ahmetov, aqtaýlyq Isataı Súıeýbaev jáne pavlodarlyq ardagerler Sembaı Qalıev pen Qabysh Kóktaev bar. Bular joǵary nagradaǵa usynylyp, sol marapatyn ala almaı ketken ardager ata-ájelerimiz. Ázirge tek 8 ardager týraly naqty derekter men málimetter bar. Aldaǵy ýaqytta partııanyń qoldaýymen osy baǵyttaǵy jumystar odan ári jalǵasyp, joǵaryda aıtqan júzden astam ardagerdiń bári anyqtalatyn bolady.
Osy bastamanyń nátıjesi retinde «Erlik eshqashan umytylmaıdy» degen kitap basylmaq. Oǵan atalǵan ardager ákelerimiz ben atalarymyz týraly jan-jaqty málimetter, olardyń erlikteri jaıynda tyńǵylyqty derekter enetin bolady. Sonymen qatar «Nur Otan» partııasy Tóraǵasynyń Birinshi orynbasary búginde Astana qalasynda turatyn ózge de Uly Otan soǵysy ardagerleriniń úılerine arnaıy baryp, Jeńis kúnimen quttyqtady. Partııa tarapynan qurmet kórsetilgen ardagerlerdiń biri Seıilbek Ákimbekuly Ýsın bıyl 97 jasqa tolady. Soǵysqa 1942 jyly attanǵan ol áıgili Kýrsk shaıqasyna qatysqan. Dneprden ótip, Harkov, Kıev qalalary men Polshany jaýdan azat etýge óz úlesin qosady. Maıdan dalasynda qaısarlyqtyń jarqyn úlgisin kórsete bilgen Seıilbek ata Berlınge deıin jetken ardagerlerdiń qatarynda.
Soǵystan keıin bilim berý isi men jýrnalıstıka salasynda uzaq jyldar boıy jemisti eńbek etti. Jeti bala tárbıelep ósirgen atamyz búginde olardan 23 nemere, 26 shóbere súıip otyr. Sondaı-aq Máýlen Áshimbaev Uly Otan soǵysynyń ardageri Ekaterına Stefanovna Pısarevany da arnaıy quttyqtady. Ekaterına Stefanovna soǵys jyldary gospıtalde jumys istegen. Maıdanǵa azyq-túlik pen dári-dármek jiberý jumystaryna da aralasty. Keıin 2-shi Ýkraına frontynda qyzmet etken Ekaterına ájeı Jeńis kúnin Bratıslavada qarsy aldy. Ekaterına Pısareva Qazaqstanǵa kóptegen tyń ıgerýshilermen birge 1960-jyldary kóship kelgen. Partııa Tóraǵasynyń Birinshi orynbasary ardagerlerdi búgingi beıbit zamanymyzdyń kepili bolǵan Jeńis kúnimen quttyqtap, olarǵa zor densaýlyq jáne qajymas qaırat tiledi.
«Sizder el basyna kún týǵanda esh taısalmaı eren erliktiń erekshe úlgisin kórsettińizder. Soǵystan keıingi qıyn-qystaý kezeńde de adal eńbekterińizben elimizdiń es jıyp, eńse tikteýine úlken úles qostyńyzdar. Sol úshin erlikterińizdi dáriptep, Sizderge laıyqty qurmet kórsetý - bizdiń perzenttik boryshymyz», - dedi Máýlen Áshimbaev.
Jalpy mereke kúni nurotandyqtar elimiz boıynsha eki myńnan astam Ekinshi dúnıejúzilik soǵys ardageriniń úılerine arnaıy baryp quttyqtaǵanyn atap ótken jón. Odan bólek, «Nur Otan» partııasy Jeńis kúnine oraı taǵy basqa da kóptegen is-sharalar ótkizip, tyń bastamalardy júzege asyrdy. Solardyń biri «Ardagerlerdi ardaqtaıyq» partııalyq jobasy aıasynda qolǵa alynǵan «Qaharman dańǵyly» aktsııasy. Bul bastama arqyly nurotandyqtar men «Jas Otan» Jastar qanatynyń ókilderi Uly Otan soǵysynyń batyrlary jáne ardagerleriniń esimderimen atalǵan kóshelerdi abattandyryp, senbilikter ótkizdi.
Atalǵan aktsııaǵa elimiz boıynsha 6 myńnan astam nurotandyq pen jasotandyq qatysty. Osy rette aıta keter jaıt, búginde Qazaqstanda Ekinshidúnıejúzilik soǵystyń batyrlary men ardagerleriniń esimderi berilgen 1000-ǵa jýyq kóshe bar. Eń kóbi Ońtústik Qazaqstan oblysynda tirkelgen. ıAǵnı, bul óńirde Uly Jeńisti jaqyndatqan jandardyń esimderimen atalatyn 300-ge jýyq kóshe bar. «Qaharman dańǵyly» aktsııasy aıasynda bul kóshelerdiń barlyǵynda kóshetter otyrǵyzý, aýlalardy qalpyna keltirý, qoqystardan tazartý sııaqty abattandyrý jumystary júrgizildi.
