Erligi fılmge aınalǵan Erbol Otarbaev: Ulttyq ulan sarbazdary eshqashan keri sheginbeıdi
ASTANA. QazAqparat - Elordada búgin 19 jasynda erlik jasaǵan jaýynger Erbol Otarbaevtyń ómirin arqaý etken fılmniń tusaýkeseri ótti. «Altynshy beket» atty kórkem fılmdi «Habar» agenttigi men «AıÝ SINEMA» kınostýdııasy birlese túsirgen. Basty róldi somdaý múmkindigine akter Sanurjan Súleımenov ıe bolypty. Al biz osydan 8 jyl buryn búkil Qazaqstan halqyn tamsandyrǵan qaısarlyq ıesi, Táýelsizdiktiń qurdasy, ІІІ dárejeli «Aıbyn» ordeniniń ıegeri Erbol Otarbaevpen tildesýge múmkindik aldyq.
Suhbat aldynda sol bir oqıǵany eske túsire ketsek. Fılmniń sıýjet jelisine Ulttyq ulannyń jaýyngeri Erbol Otarbaevtyń 2010 jylǵy 22 maýsymda Aqtaý qalasyndaǵy túzeý mekemesin kúzetý boıynsha qaraýyl qyzmetinde turǵan kezindegi janqııarlyq erligi negiz bolǵan. Sol kezde jas jaýynger qatań tártiptegi kolonııadan qashpaq bolǵan 21 jazasyn óteýshiniń jolyna jalǵyz ózi tosqaýyl qoıa bilgen. Oqıǵa kezinde Erbol úsh jazasyn óteýshiniń kózin joıǵan. Ózi aýyr jaraqat alyp, 6 aı boıy aýrýhanada jatqan. Osy erligi úshin Erbol Memleket basshysynyń Jarlyǵymen 3 dárejeli «Aıbyn» ordenimen marapattalǵan bolatyn. Búginde Erbol Ulttyq ulannyń ofıtseri.
- Erbol, sol oqıǵadan beri 8 jyl óte shyqty. Osy ýaqytqa deıin de myń ret suraǵan bolar. Dese de, sol bir oqıǵaǵa ózińiz búgingi kózben qalaı qaraısyz?
- Sol oqıǵa áli kúnge deıin esimde. Álbette, ondaı jaǵdaıdy ómir boıy umytý múmkin emes shyǵar. Mundaı kún basyna týsa Ulttyq ulannyń eshbir sarbazy eshqashan artqa sheginbeıdi, shegingen de emes. Sol kezdi búgin esime alyp otyrsam, bar oıym - sottalǵan azamattardy toqtatý ǵana bolǵan eken. Ol meniń - mindetim. Men áskerge azamattyq boryshymdy óteımin dep keldim. Sondyqtan, maqsatym men mindetimdi aıqyn bildim. Maqsatym batyr ataný emes edi, tek ózim mindetimdi atqaryp júrgen áskerı bólimdi, rotany, vzvodty, áke-sheshemdi, aýylymdy jerge qaratqym kelmedi. Atalarymnyń, babalarymnyń arýaqtary qoldady. Sonyń arqasynda mine, sizderdiń aldaryńyzda aman-esen turmyn degim keledi. Shúkirshilik etemin. Bul eń aldymen Allanyń, sodan keıin áke-sheshemniń arqasy degen oıdamyn.
Ol jerde maǵan áskerge kelgen kezimde is-tájirıbe kezinde, oqıǵanyń aldynda qandaı is-áreketterdi atqarýdy úıretpese men ondaı qaýipke daıyn bolmas edim. Ofıtserler men komandırlerdiń bergen biligi men bilimin úırenip, áskerde alty aı ǵana bolsam da júktelgen mindetti abyroımen atqarǵanyma qýanyshtymyn.
- Túsirilim alańynda boldyńyz. Rejısser men akterlerge qandaı da bir aqyl-keńes aıtqan bolarsyz?
- Álbette, túsirilim tobyna bar oıymdy bildirdim. Bul fılm tek meniń ómirim týraly ǵana emes, Ulttyq ulannyń sapyndaǵy jaýyngerlerdiń kúndelikti atqaryp júrgen mindetterin kórsetedi. Óıtkeni, Ulttyq ulan sarbazdary osyndaı qyzmetterdi kúnde ótkeremiz. Kıno tek men týraly degen pikirdi quptamaımyn.
Qandaı oqıǵa kezdesse de, bizdiń qazaq halqy qaısarlyq tanyta bilgen el. Tarıhymyz kýá. Babalardyń erligin bilemiz. Maqtan tutamyz. Aǵa býyn Táýelsizdikti alyp bergendikten, biz egemendiktiń týyn bıikke kóterip, kózimizdiń qarashyǵyndaı saqtaı bilýimiz kerek.
- Fılmde basty róldi somdaǵan Sanurjan Súleımenovpen dostasyp ketken bolarsyz.
- Sanurjan Súleımenov óte qarapaıym jigit. Qazir týra sol oqıǵa (2010 jyl) kezindegi meniń jasymda. Men ol kezde 19-da edim. Álbette, ekeýimiz qatty dostasyp kettik. Sarbazdarmen birge kazarmada boldy. Sanurjan áskerılerdiń ómirin túısine bildi degen senimdemin. Barynsha aqyl-keńesimdi aıta bilgen sekildimin.
- Qazirgi tańda qaı jerde áskerı mindetińizdi atqarasyz?
- Búgingi kúni Shymkent qalasyndaǵy 6698 áskerı bóliminde tárbıe jáne áleýmettik quqyqtyq jumystar jónindegi bólimshe bastyǵy bolyp qyzmet atqaryp júrmin.
- Jalpy, 2010 jyly ótken sol bir oqıǵa áskerı ómirdi tańdaýyńyzǵa muryndyq boldy ma?
- Toǵyzynshy synyptan bastap áskerı bolýdy arman ettim. Áskerge kele sala kóp tájirıbe kerektigin túsindim. Komandırlerdiń aıtqanyn eki etpeýge tyrystym. 2011 jyly Petropavl qalasynda ornalasqan áskerı oqý ornyna oqýǵa tústim. 2015 jyly aıaqtap, leıtenant ataǵyn aldym.
- Úıde neshe balasyzdar?
- Úıde alty balamyz. Úsh ul, úsh qyz. Men kenjesimin.
- Ózińizdiń otbasyńyz bar ma?
- Úılengenmin. 28 qańtar kúni uldy atandym. Ulymnyń atyn Ulttyq ulannyń bas qolbasshysynyń (Rýslan Jaqsylyqov) qurmetine Rýslan dep qoıdym.
- Kóptiń nazarynan qysylatyn kezińiz bola ma?
- Álbette, basynda qysylǵanymyzben, qazir úırenip qaldyq. Áke-sheshemizdiń bir ǵana «uıat bolady» degen sózimen jetilgen aýyldyń balasymyz. Áýletimizdegi atalarymyzdyń tórteýi soǵysqa ketip, ekeýi jaraqatpen qaıtyp kelipti. Ákem de, inileri de áskerde boldy. Áskerge barmaýǵa uıatym jibermedi. Áskerge barmasam, olardyń aldynda uıatty bolar edim.
Eldiń aldyna shyqqan kezde oıymda bir sóz júredi. Aýyldaǵy qarııalarymyz «Atańnyń balasy bolma, adamnyń balasy bol» deıtin. Sol ustanym sanamnan shyqqan emes.
- Ózińiz týraly fılmnen ne kútesiz?
- Fılm elimizdiń jastaryna patrıottyq rýh berip, áskerimiz qandaı joǵary dárejede ekenin kórsete biler degen senimdemin.
- Suhbat bergenińizge kóp rahmet! Eńbegińiz jemisti bolsyn!
