Erli-zaıyptylardyń on jyldan bergi baspanasy - beton qudyq (FOTO)
ASTANA. QazAqparat - Qytaıdaǵy Chjenchjoý qalasynda turatyn erli-zaıyptylar kúndelikti ómirdiń aýyrtpalyǵymen ózderinshe kúresýde. Olar páter jaldaýǵa ketetin aqsha men jumysqa baratyn jolaqysyn únemdeý úshin mundaǵy ýnıversıtetke tıesili aýa jeldetkish qudyqty panalaýda.
Qudyqta turǵanyna on jyldan asa ýaqyt bolǵan otbasy barlyǵy 50 sharshy metr jerge oryn tepken. Olardyń bul «baspanaǵa» úırenip alǵany sonshalyq, tipti qudyq tıesili ýnıversıtet ákimshiliginiń usynǵan jataqhanasyna da kóshýden bas tartqan, dep jazady Ecns.cn.
Sebebi erli-zaıyptylardyń aıtýynsha, qudyqta barlyq jaǵdaı jasalǵan. Munda sý, elektr jaryǵy, jylý júrgizilip, teledıdar, tońazytqysh pen kir jýý mashınasy da qoıylǵan. Aıta ketý kerek, erli-zaıyptylardyń ekeýi de osy ýnıversıtette jumys isteıdi. Otaǵasy jeldetkish qudyqtyń tehnıkalyq ahýalyna jaýapty bolsa, onyń áıeli osy jeldetkish júıeni ýaqtyly qosyp-ajyratyp turady. Olar osydan biraz ýaqyt buryn arzan baǵamen jalǵa beriletin páter taýypty. Biraq, ol baspana turǵan jerden jumysqa jetý úshin jarty kún ýaqyt ketetin bolǵandyqtan, otbasy ózderi jumys isteıtin ýnıversıtet aýmaǵyndaǵy osy qudyqta qalýdan ózge amal tappaǵan, dep habarlaıdy 24.kz. Foto:http://www.ecns.cn/
