Erli-zaıyptylardy 5 aı boıy quldyqta ustap, satyp jibermek bolǵan - OQO
ShYMKENT. QazAqparat - Ońtústik Qazaqstan oblysynda jasy kelgen erli-zaıyptylardy qamap ustap, mal baqqyzǵan. Alpysty alqymdaǵan el aǵasy men zaıyby Ózbekstannan jumys izdep kelip, bes aı boıy azapty kúnderdi bastan ótkergen, dep habarlaıdy «QazAqparat» HAA tilshisi.
Qýatbek Nurymbetov pen Aıagóz Shatabaeva 2012 jyly Ózbekstannan qonys aýdarǵan. Ordabasy aýdanyna jumys izdep barǵan erli-zaıyptyny bir kisi eki kún mal baǵyp ber dep jaldapty. Alaıda eki kún bes aıǵa sozylady. Osy ýaqyt aralyǵynda olar quldyqta bolyp, ómirimiz tozaqqa aınaldy dep ashynady.
«Qoı baǵýǵa jaramaımyn. Insýlt alǵanmyn. Tólqujattarymyzdy alyp qoıdy, aılyǵymyzdy bermedi. Muzdaı úı, kómir joq. Sý joq. Qınaldyq endi ábden. Nebir sýyqta jattyq», - deıdi Qýatbek Nurymbetov.
Soraqysy sol, izdeý-suraýy joq ekeýdi qojaıyny puldamaqshy da bolypty. Mal ıesiniń aıazdaı qaryǵan aýyr sózderi Aıagóz apanyń esine tússe, áli kúnge deıin denesi túrshigedi.
«Bizdi bireýge 200 myń teńgege satpaqshy boldy. Osynyń aldynda telefon shaldy. Ol qoryqty ma áıteýir almady bizdi. Qul qylam, seniń eshkimiń joq dedi. Osy jerde ólesiń dedi. Aýdandaǵy tártip saqshylarynyń bári tanysymyz, qoldaryńnan eshnárse kelmeıdi, eshteńe isteı almaısyńdar, kóshi-qon polıtsııasyna ustatyp jiberemiz dep qorqytty», -deıdi Aıagóz Shatabaeva.
Jumys isteımiz dep ábden qorlyq kórgen erli-zaıyptylarǵa jaqsy adamdar kezdesip, qolushyn sozǵan. Keıinnen ekeýine Shymkenttegi «Sana-Sezim» áıelder bastamalyq-quqyqtyq ortalyǵy kómek kórsetti. Ortalyqtyń áleýmettik qyzmetkeri Shahlo ıÝsýpjanovanyń sózinshe, kórshi elden kelgen ekeýdiń múldem azamattyǵy bolmaı shyqqan. Qazir Keńes dáýirindegi tólqujatpen júrgender esh jerde tirkelmepti. Ortalyq mamandary qazir Ózbekstan elshigine suranys hat joldap, qujat jasatýdyń qamyna kirisip ketipti.
«Erli-zaıyptylarǵa qorlyq kórsetkenderdiń tıisti jazasyn alýy úshin quqyqtyń keńes berip, quzyrly organdarǵa aryz joldandy. Búginde olardyń Qazaqstan azamattyǵyn alý úshin jumystar júrgizýdemiz. Sebebi, bul kisiler buryn bizdiń eldiń azamattary bolǵan da, keıinnen toǵyz jyl boıy kórshi elde turyp kelgen. Endi bir aıdan keıin, olar jeke kýáligin alady. Osylaısha, elimizdiń tolyqqanda azamaty bolyp shyǵady», - deıdi Shahlo ıÝsýpjanova.
Ortalyq mamandarynyń aıtýynsha, kóp jaǵdaıda adamdar quldyqqa ushyrap, qujattarynan aıyrylady. Ótken jyldyń alty aıynda 1500-deı adam osyndaı máselemen kómek surap kelipti.
Basym kópshiligi Reseı, Koreıa, Arab Ámirlikteri men Túrkııa, Portýgalııa elderine jumys izdep baryp, quldyq ómir súrgen azamattar eken. Al, jyl basynan beri quldyqqa salynǵan 8 adamǵa ortalyq tarapynan kómek kórsetilgen. 
