Erli-zaıyptylar «General Motors» kompanııasynan 500 mln. dollar talap etýde
ASTANA. QazAqparat - Kanadalyq Kornýoldaǵy erli-zaıyptylar Dennı jáne Sıýzan Beıkerler balalarynyń apattan mert bolýyna baılanysty «General Motors» kompanııasynyń atyna talap-aryz túsirdi.
Belgili bolǵandaı, bul otbasynyń Nıkolas esimdi balasy «Saturn Ion» avtokóligimen apatqa ushyrap, ajal qushqan. Atap aıtqanda, bul kólik modeli osy kompanııa aqaýlary úshin qaıtaryp jatqan avtomobılderdiń arasynda bolǵan eken. Osy oraıda Beıkerler otbasy kontsernnen 500 mln. dollar kóleminde ótemaqy talap etýde.
Olardyń qorǵaýshylarynyń túsindirýinshe, apat kezinde bul jigittiń kóliginde qaýipsizdik jastyqshalary iske qosylmaǵan.
Osynyń aldynda «General Motors» 1,6 mln. kólikti qaıtaryp jatqandyǵy jaıynda málimdedi. Buǵan otaldyrý júıesindegi aqaýlyq saldarynan 14 adamnyń ajal qushýy sebep boldy.
