Erli-zaıyptylar birden 4 balany asyrap aldy
ASTANA. QazAqparat - Astanadaǵy balalar úıinde erekshe jaǵdaı boldy dep habarlaıdy QazAqparat ákimniń saıtyna silteme jasap..
Balasy joq erli-zaıypty jetim qyzdy asyrap alýǵa keledi. Onyń ata-anasy ata-analyq quqynan aırylǵan eken. Álgi búldirshin qyzdyń týǵan inisi men sińlisi bar eken. Onyń biri mamandandyrylǵan balalar úıinde, ekinshisi kámelet jasyna tolmaǵandardy beıimdeý ortalyǵynda bolypty. Oılana kele bala asyrap alýǵa úmitker otbasy tórteýin de patronattyq tárbıege alamyz dep sheshim qabyldady, dep habarlady «Balalar úıi» KMM tárbıe jumysy jónindegi dırektordyń orynbasary Oskana Dzıýba elorda ákimdiginiń medıa ortalyǵy tilshisine.
Ótken jyly asyrap alǵysy keletin úmitkerler kóbine balasyz juptar bolatyn. Áleýmettik qyzmetkerdiń aıtýynsha, qazir Astanadaǵy balalar úıine 2-3 balasy barlar da kelip, asyrap alýǵa nıetteri baryn bildirgender kóbeıgen.
2016 jyly balalar úıiniń bazasy janynan «Otbasyny qoldaý ortalyǵy» ashylǵan bolatyn. Osy maqsatta «Ana úıi» qoǵamy qory, «Balalar úıi» MKM, astanalyq bilim basqarmasy memorandýmǵa qol qoıdy.
«Senbi saıyn kýrsqa asyrap alǵysy keletin ata-analar keledi. Óz otbasyna bóten balany alyp ketý ońaı sheshim emes. Ata-analar balanyń psıhologııasyn túsinip, onyń bolashaǵyna degen jaýapkershilikti túsinýi qajet», - deıdi O.Dzıýba.
Bala asyraýshy otbasy mektebinen ótken soń, asyrap alýshy juptar respýblıkalyq bazadan jetim balalar týraly tolyq aqparatpen tanysa alady.
Qazir astanalyq balalar úıinde 4 jastan 18 jasqa deıin 74 bala bar.
«Qazir bizde tárbıelenýshiler sany azaıyp keledi. Bul balamaly túrde otbasylarǵa ornalastyrý, bala asyrap, qamqorlyqqa alý, patronattyq júıeniń belsendi damýymen baılanysty bolyp otyr. Jyl basynan beri bizdiń balalar úıinen 33 bala jańa otbasyn tapty», - deıdi O.Dzıýba.
