Erli-zaıypty Jıenbaevtar shańyraq kóterýiniń 70 jyldyq mereıtoıyn atap ótýde (FOTO)
Olar nekesin 1945 jyldyń 17 qańtarynda Almatyda tirkegen. Baqytty nekeniń qupııasy nede dep suraq qoıǵanda, olar bylaı dep jaýap berdi: «Árıne, mahabbat bolýy kerek, biraq kúndelikti ómirde eń bastysy - ózara qurmetteýshilik, qıyndyqqa tap bolǵan kezde ony birge talqylap, bir-birimizdiń pikirimizdi tyńdaımyz», - dep atap ótti olar.
Sultan Súleımenulynyń oıynsha, sonymen birge adaldyq pen parasattylyq ta mańyzdy.
«Nuranııa Kereıqyzy úı sharýasyna árqashan jaqsy qarady. Barlyq dostarym men týǵan-týysqandarymdy menen de qatty syılaıtyn. Qonaqtardy árqashan jyly shyraımen qarsy alatyn. Ol - meniń jaqtasym, kitap jazǵan kezde, nemese jurt aldynda sóıleıtin sózderimdi daıyndaǵanda árqashan onymen keńesemin, óıtkeni ol óte bilimdi adam. Meniń zaıybym jumys isteýge de, úı sharýasy men balalardyń tárbıesine qaraýǵa da árqashan úlgerip júrdi. Al men qyzmetime baılanysty syrtta, issaparlarda kóp júrdim. Eki balamyz bolǵan kezde, maǵan Máskeýde bilim alýǵa usynys bildirildi, ol bolsa, qalyp, meni kútip júrdi», - dep eske alady Sultan Súleımenuly.
Uzaq jasaýynyń qupııasyn suraǵanda, ol soǵystan oralǵan soń, ómir boıy Otan ıgiligi úshin jumys isteýden baqyt tapqanyn aıtty. Onyń basty baılyǵy - halqynyń qurmeti.
«Barlyq balalarymyzdy ósirip, tárbıeledik, tuńǵysh balamyz - tehnıka ǵylymdarynyń kandıdaty, qyzymyz - bıologııa ǵylymdarynyń, al kenje ulymyz - zań ǵylymdarynyń kandıdaty boldy. Úlken balamyz 68 jasta, bizdiń alty nemeremiz, 13 shóberemiz bar, úlken shóberemiz 19 jasta», - dep atap ótti N.Ádelshına.
Esterińizge sala keteıik, ótken jyly erli-zaıypty Jıenbaevtar Qazaqstannyń Gınnestiń rekordtar kitabyna uzaq otbasylyq ǵumyr keshýden rekord ornatty.
«Men úshin bıylǵy jyl asa erekshe: shańyraq kótergenimizge 70 jyl, Uly Otan soǵysyndaǵy Jeńis merekesine 70 jyl tolady. Bul merekeni taǵatsyzdana kútip otyrmyz, óıtkeni ol kúni tiri qalǵan maıdangerlermen kezdesemiz. Bul erekshe kúndi meniń jaqyn dostarym - Keńes Odaǵynyń eki márte Batyry Talǵat Bıgeldınov pen Keńes Odaǵynyń Batyry, Halyq Qaharmany Saǵadat Nurmaǵambetov kóre almaǵany ókinishti. Barlyq ardagerlerdi kele jatqan 2015 jylmen quttyqtaǵan el Prezıdentiniń zor qamqorlyǵyn taǵy bir atap ótkim keledi. Bul jastardyń boıynda patrıottyq sezimdi tárbıeleý isinde óte mańyzdy», - dep túıindedi Sultan Súleımenuly.
