Erli-zaıypty Stanıslav pen Valentına Alıfırenkolar indetpen kúreste aldyńǵy shepte - Petropavl
PETROPAVL. QazAqparat – Petropavldaǵy erli-zaıypty Stanıslav pen Valentına Alıfırenkolar elde qaýipti indetpen kúres bastalǵaly aldyńǵy shepte júr. Otaǵasy – tártip saqshysy bolsa, onyń jubaıy - medbıbi, dep habarlaıdy QazAqparat tilshisi.
6 jasar Valerııa Alıfırenkonyń anasyn kórmegenine bir aıdan asty. Búldirshin sheshesiniń aıaly alaqanyn saǵyndy. Onyń anasy Valentına Vıktorovna Petropavldaǵy birinshi qalalyq aýrýhanada meıirbıke bolyp jumys isteıdi, al onda koronavırýspen aýyrǵan naýqastar emdelýde. Infektsııany taratpaý úshin ol da basqa medıtsınalyq qyzmetkerler sııaqty ýaqytsha basqa baspanada turyp jatyr.
Al otaǵasy Stanıslav Evgenevıch ýchaskelik polıtsııa ınspektory. Onyń jumys kúni tańǵy saǵat 8.00-den túngi 11.00-ge deıin sozylady. Oǵan kúnine túrli máselelerimen ondaǵan adam keledi. Biriniń zaty urlansa, endi biriniń kórshileri - maskúnem. Bir shańyraq astynda turatyn adamdardan zardap shekkenderdi de qorǵaıtyn jaǵdaılar týyndap jatady. Stanıslavtyń buzylǵaly turǵan otbasyn saqtap, shańyraqtyń berekesin keltirýge septigin tıgizgen kezderi az emes.
SQO Polıtsııa departamenti baspasóz qyzmetiniń málimetinshe, Stanıslav pen Valentına Alıfırenkonyń shańyraq kótergenderine 7 jyldan asty. Olardyń ekeýi de kópbalaly otbasynda dúnıege kelgen. Stanıslavtyń úsh ápkesi bar, onyń jubaıy Valentına egiz qyzdyń syńary, odan bólek eki aǵasy bar. Qazir árkimniń óz otbasy bar, soǵan qaramastan olar árqashan bir-birine kómek qolyn sozýǵa daıyn.
«Qazirgi jaǵdaıǵa baılanysty Valentına úı betin kórmeıdi, al men negizinen tek túneýge kelemin. Osyndaıda Valerııanyń janynan ájeleri men ápkeleri tabylady. Olar qyzymyzǵa sabaǵyn oqýǵa kómektesip, anasyn saǵynǵan botaqannyń kóńilin aýlaýǵa tyrysady. Osyndaı qıyn-qystaý shaqta otbasynyń aýyzbirshiligi, kómegi kerek-aq», - deıdi Stanıslav Alıfırenko.
Karantınniń saldarynan Alıfrenkolar otbasyna da óz josparlaryn ózgertýge týra keldi.
«Bári ýaqytsha. Bul jaǵdaı da ótip, bári ornyna keledi. Árıne, biz demalysymyzda bir jaqqa barýdy josparlaǵan edik. Kóbine Býrabaı men Almatyny tańdap, Reseı qalalaryn aralaıtynbyz. Bıyl alys saparǵa shyǵýdan bas tartýǵa týra keledi. Qazir Valentınanyń tezirek úıge oralǵany mańyzdy. Pandemııa kóptegen otbasyn biriktirdi. Al, bizdi eki jaqqa bólip tastady. Alaıda qazirgi jaǵdaıǵa túsinistikpen qaraımyz», - deıdi Stanıslav.
Aqerke Dáýrenbekqyzy
