Erli-zaıypty polıtseıler: Túngi reıdterge de birge shyǵamyz
JETІSAI. QazAqparat - Túrkistan oblysy Jetisaı aýdandyq polıtsııa bóliminiń Jergilikti polıtsııa qyzmetiniń ıÝvenaldyq polıtsııa tobynda erli-zaıypty tártip saqshylary qyzmet atqarady.
Polıtsııa kapıtany Azamat Saltóreev pen aǵa ınspektor Dına Áýbákirovanyń qosylǵandaryna bıyl segiz jyl bolǵan, dep habarlaıdy QazAqparat tilshisi.
Qos birdeı tártip saqshysy bir-birimen oqý praktıkasynda júrip tanysqan. Sońynan úılenip, búginde eki perzent súıip otyr.
Otaǵasy Azamat Saltóreevtyń aıtýynsha, 2011 jyly Semeı zań kolledjin bitirip kelgen soń qyzmetin Maqtaaral aýdanynda ýchaskelik polıtsııa ınspektory bolýdan bastaǵan. Bir jyldan soń Jetisaı aýdanyndaǵy polıtsııa bólimi Jergilikti polıtsııa qyzmeti ıÝvenaldyq polıtsııa tobyna aýysqan.
«2012 jyly osy toptaǵy aǵa ınspektor Dına Áýbakirovamen tanysyp, aramyzda sezim paıda boldy. Kóp uzamaı, ekeýmiz úılendik. Qazir Alpamys (6 jasta) jáne Shahadat (4 jasta) atty uldarymyz bar, buıyrtsa úshinshi perzentimizdi súıýge daıyndalyp jatyrmyz. Jurt aıtyp jatady ǵoı, kelinshegi polıtseı bolsa otbasyna balalaryna ýaqyty bolmaıdy dep. Men aıtar edim, meniń jubaıym únemi januıamyzǵa da, jumysyna da úlgeredi. Ári ekeýmiz bir topta jumys atqarǵandyqtan, bir-birimizdi jaqsy túsinemiz. Máselen, jasóspirimderge qatysty túngi reıdterge birge shyǵamyz. Balalarmen jumys isteýde ekeýmiz aqyldasyp, tájirıbe almasyp otyramyz. Al, balalarǵa qaraýda neizinen ata-analarymyz bizge qolǵabys etip otyrady»,- deıdi polıtsııa kapıtany.
Azamat Saltóreevtiń sózinshe, bul mamandyqty tańdaýǵa ákesi sebepker bolǵan. Ol kisiniń qyzmetin jalǵastyrsam degen armany sol bala kezde-aq paıda bolypty.
«Ákem Saǵadat Saltóreev osy polıtsııa bóliminde eńbek etip, zeınetke shyqqan. Búginde ekinshi ulym Shahadat ta ata-anam sııaqty polıtsııa qyzmetkeri bolamyn dep aıtyp júr. Árıne, tártip saqshysy bolý ońaı emes. Ýaqytpen sanaspaı jumys isteýińe týra keledi. Biraq adam ózi mamandyǵyn júrek qalaýymen tańdasa, kez-kelgen qıyndyqty jeńe biledi ári jetistikke de jetedi dep aıta alar edim. Sondaı-aq, mereke kúni áriptesterime aıtarym, qıyn da jaýapty qyzmette bıikterden kórinip, ár kún saıyn úılerine aman oralsyn»,- deıdi eki balanyń ákesi.
Al, Dına Áýbákirova bolsa óziniń de, bolashaq kúıeýiniń de tártip saqshysy bolǵanyn mektepte oqyp júrgen kezde armandaǵanyn aıtady.
«Ekeýmiz Jetisaı qalasynda bir mektepte oqyǵanbyz, biraq bir-birimizdi tanymaǵanbyz. Keıinnen osy polıtsııa bóliminde tájirıbede júrgen kezde tanysyp, bir-birimizdi unattyq. Maǵan bul jumys ózim unaǵandyqtan qıyn dep eseptemeımin. Tańerteń erte turyp, kez-kelgen ýaqytta jumysqa shaqyryp qalǵanda da daıyn turamyz. Bul jaǵynan kúıeýimiz ekeýmiz bir-birimizdi jaqsy túsinemiz. Polıtsııa qyzmetkerleri bir-birimen úılense, januıasy da myqty bolady. Úıde júrgende jumys týraly múmkindiginshe jumys týraly aıtpaýǵa tyrysamyz. Al, qolymyz bosaǵanda balalarmen kóbirek ýaqyt bólgimiz keledi»,- deıdi aǵa ınspektor.
Búginde ıÝvenaldy polıtsııa tobynda qyzmet atqaratyn kelinshek kámeletke tolmaǵandarmen jumys isteý ózine unaıtynyn aıtady. Sebebi, balalarmen sóılesý, olardy jaqsy jolǵa salý janyna jaqyn. Degenmen jaısyz otbasylarmen jumys istegende qınalatyn kezderi bolatynyn jasyrmady.
«Polıtsııa bolǵanymmen men áıelmin, anamyn ǵoı. Jaısyz otbasylarǵa barǵanda kózime jas keletin kezder de bolady. Ondaı kezderde tek túsindirý jumystaryn júrgizip qana qoımaı, qolymnan kelgenshe kómektesýge tyrysamyn. Bir kúndik tamaǵyn alyp bergen kezderim de boldy. Balalaryna tátti áperip, anasyn jubatýǵa tyrysamyn. Múmkindiginshe balalaryn tastamaýǵa, jetimder úıin ótkizbeýge ótinish jasaıtyn kezderim de bolady»,- deıdi polıtseı kelinshek.
Búginde úshinshi perzentine aıaǵy aýyr tártip saqshysy halyqty qolda bardy baǵalaýǵa shaqyrady. Sebebi, januıadaǵy jylýlyq pen ata-ana mahabbaty balalar úshin asa mańyzdy.
«Men árbir balanyń ata-anasynyń qasynda, baqytty bolsa dep aıtar edim. Sol úshin azamattarda turaqty jumys bolsa, otbasylarynda bereke bolsa degim keledi. Al, ózimde shúkir, barlyǵy bar. Ata-analarym aman, meni súıetin kúıeýim men qos balapandarym bar, ózim jaqsy kóretin jumysym bar. Sony baǵalaýǵa tyrysamyn. Jumystan sharshap kelgende januıańdy, balalaryńdy kórip demalasyń. Maǵan odan asqan baqyt joq. Elimizde beıbitshilik zaman bolsa, árbir otbasy baqytty bolady dep oılaımyn»,- deıdi Dına Áýbákirova.
