Erli-zaıypty qarııalardy óltirgen Almaty turǵyny 20 jylǵa sottaldy

ALMATY. QazAqparat – Almaty qalasynyń qylmystyq ister jónindegi mamandandyrylǵan aýdanaralyq sotynda egde jastaǵy erli-zaıyptylardy óltirgen, qylmys jaıynda habarlamaǵan jáne qyzmettik ókilettigin asyra paıdalanǵan úsh adamǵa úkim shyqty, dep habarlaıdy QazAqparat tilshisi.

Sot anyqtaǵandaı, sottalýshy qamqorshy bolyp, keıin múlkin ıemdený úshin maskúnemdikke salynǵan nemese jalǵyz turatyn qarttardy izdegen.

«Mundaı adamdardy izdep tabý úshin ol Ý. esimdi adamǵa júgingen. Ol tanys polıtsııa qyzmetkerinen joǵaryda atalǵan sanattaǵy azamattar týraly málimet suraǵan. Polıtseı qyzmettik ókilettigin asyra paıdalanyp, oǵan málimet bergen»,- dep habarlady Almaty qalasynyń qylmystyq ister jónindegi mamandandyrylǵan aýdanaralyq sotynan.

Vedomstvo málimetinshe, sottalýshy zeınetkerdiń úıine baryp, qamqorlyq kórsetetinin aıtyp, áıelmen baılanys ornatpaq bolǵan. Alaıda ol kómekke shaqyryp, aıqaılaı bastaǵan.

Bireý kelip qala ma dep qoryqqan sottalýshy áıeldi tunshyqtyryp óltirgen. Keıin tósekte jatqan kúıeýin kórip, ony da tunshyqtyryp, qylmys ornynan boı tasalaǵan.

Sotta belgili bolǵandaı, sottalýshy jábirlenýshilerdiń páterine bara jatqanda olardy óltirý oıynda bolmaǵan, búkil áreketi oılamaǵan jerden jasalǵan.

«Sottalýshylardyń aıǵaqtarynan belgili bolǵandaı, olar jábirlenýshiler týraly málimet bere otyryp, olardyń múlkin zańdy túrde atyna jazyp alý nıetinde bolǵan»,- dep atap ótti sottaǵylar.

Sot aıyptalýshyny kisi óltirdi dep tanyp, 20 jylǵa bas bostandyǵynan aıyrdy.

Sottalýshy Ý. qylmys týraly habarlamaǵany úshin kináli dep tanylyp, 4 jylǵa sottaldy.

Polıtseı qyzmettik ókilettigin asyra paıdalanǵany úshin kináli dep tanylyp, 5 jylǵa bas bostandyǵynan aıyryldy.

Úkim zańdy kúshine engen joq.