Erlan Ydyrysov: Astana - ataqqumarlyqtyń jobasy emes
ASTANA. QazAqparat - Qazaqstannyń Ulybrıtanııadaǵy elshisi Financial Times gazetine hat joldap, «El astanasy ataqqumarlyq jobasyna aınalǵanda» atty maqalaǵa jaýap berdi.
Ol hatta Qazaqstannyń jańa astanasyn el ortalyǵynan salý týraly sheshim 1997 jyly qaýipsizdikti qamtamasyz etý maqsatynda ǵana qabyldanǵanyn aıtty. «Almaty seısmologııalyq belsendi aımaqta, eldiń shyǵys shekarasyna jaqyn jerde ornalasqan. Jańa elorda -Astananyń salynýy táýelsiz Qazaqstanǵa óziniń keńestik júıeden qol úzýge múmkindik berdi. Ol kezde Qazaqstan Stalınniń saıası tutqyndar men tutas halyqtardy kóshiretin «úıindi» dep sanaldy, keıinnen «qyrǵı qabaq soǵys» kezinde ıadrolyq qarý synaqtaryn ótkizetin aımaqqa aınaldyryldy».
1999 jyly Astana halqynyń sany 281 myń bolǵan. 2007 jyly qala turǵyndarynyń sany 600 000-ǵa jetti. Búgingi tańda elordada bir mıllıonnan astam adam turady. Qala qarqynmen damyp keledi. Onda, ózgeni qoıa turǵanda, ýltrazamanaýı, záýlim opera jáne balet teatry bar. Ol ataqqumarlyqtyń jobasy emes, dedi elshi Erlan Ydyrysov. Qazaqstandyqtar Prezıdent Nursultan Nazarbaev basshylyǵymen qol jetkizgen asa zor jetistikterdi maqtan tutady. Sondaı-aq qala onyń jeke basyna tabynýshylyqtyń aıasynda qalyp qoıdy degen sóz de - absýrd. Olaı bolsa, Londondaǵy parlament alańyndaǵy ser Ýınston Cherchıllge qoıylǵan eskertkishten de osyndaı qorytyndy shyǵarýǵa bolady.
«Astana - Qazaqstannyń bolashaq áleýetiniń naǵyz úlgisi. Astanadaǵy EKSPO-2017 kórmesine 115 memleket, 22 halyqaralyq uıym qatysyp, tórt mıllıonnan astam adam asa ózekti «Bolashaq energııasy» taqyryby aıasyndaǵy sharaǵa jınaldy. Oqyrmandaryńyz da Astanaǵa baryp, dala tósinen boı kótergen keremet qaladan áserlerin bólisýge asyǵady dep senemin», - delingen habarlamada.
