Erlan Turǵymbaev jas polıtseılerge alǵashqy qyzmettik kýálikterin tapsyrdy
NUR-SULTAN. QazAqparat – Qazaqstan Respýblıkasynyń Memlekettik rámizderi kúni polıtsııa qyzmetkerleriniń qataryna qosylǵan jastar úshin erekshe kún retinde este qalatyn boldy. Mereke kúni Іshki ister mınıstri Erlan Turǵymbaev jas leıtenanttarǵa alǵashqy qyzmettik kýálikterin tapsyrdy. QazAqparat bul týraly ІІM-niń baspasóz qyzmetine silteme jasap habarlaıdy.
Kýálikti tabystaý rásimi ІІM-niń mýzeıinde ótti. Dál osy mýzeıde Qazaqstannyń ishki ister organynyń qurylý jáne damý tarıhy týraly estelikter saqtalǵan.
ІІM basshysy osynaý jaýapty sáttiń mańyzdylyǵyn erekshe atap ótip, árbir azamat Ánuran, Eltańba men Týdy qurmettep, óz Otany men elin súıýi kerektigin basa aıtty.
«Prezıdent Qasym-Jomart Toqaev polıtsııa aldynda naqty mindetti qoıdy – biz qoǵamdyq tártipti saqtap, qıyn jaǵdaıda azamattarǵa kómektesýimiz kerek. Polıtsııanyń jumysyna baǵany halyq beredi. Sol sebepti óz isterińizdiń naǵyz mamany bolýǵa jáne halyqtyń múddesin birinshi orynǵa qoıýǵa shaqyramyn. Jumystaryńyzǵa sáttilik tileımin», - dedi Erlan Turǵymbaev.
Jas ofıtserler arnaıy bólimderge, patrýlder men jasóspirimder isi jónindegi polıtsııa qataryna barady. ІІM mýzeıinde jastar ishki ister organynyń tarıhymen tanysyp, halyqtyń múddesi úshin jumys isteýge ant berdi.
Jalpy jyl basynan beri «polıtsııa leıtenanty» arnaıy ataǵy ishki ister organdarynyń 1724 qyzmetkerine berilgen.
