Erlan Turǵymbaev jalǵyzbasty anany aldaǵan alaıaqty ustaý úshin polıtseılerdi Reseıge jóneltti

NUR-SULTAN. QazAqparat – Іshki ister mınıstri Erlan Turǵymbaev elordalyq turǵynnyń ótinishinen keıin qyzmetkerlerin Reseıge issaparǵa jiberdi. Olarǵa jalǵyzbasty anany aldaǵan kúdiktini ustaý tapsyryldy, dep habarlaıdy QazAqparat tilshisi.

Mınıstrliktiń baspasóz qyzmetiniń ókili Shuǵyla Turlybektiń aıtýynsha, Erlan Turǵymbaevtyń qabyldaýyna jazylǵan adamdar óz saýaldary men ótinishterin tikeleı efırde beınebaılanys arqyly málimdep, jaýap alǵan.

«Saýaldar negizinen qylmystyq isterdi tergeýdiń sapasy men merzimderin saqtaýǵa, alaıaqtyqty ashýǵa kómektesýge, kóshi-qon zańnamasy máselelerine qatysty boldy. Sonyń arasynda Nur-Sultan qalasynan jalǵyzbasty ana habarlasyp, qyzyna uıaly telefon alyp beremin dep 400 myń teńgesinen aıyrylǵanyn aıtty. Áıeldiń aıtýynsha, áleýmettik jelidegi habarlamaǵa senip, alaıaqtarǵa 400 myń teńge aýdaryp jibergen. Biraq telefon da, aqsha da qaıtpaǵan», - deıdi ІІM baspasóz qyzmetiniń ókili.

«Internet-dúken men abonenttik nómir Reseıde tirkelgeni anyqtaldy. Qyzmetkerlerdi reseılik áriptesterimen birge sol jerde tergeýdi jalǵastyrý úshin issaparǵa jiberýdi tapsyramyn. Internet-alaıaqtardyń tuzaǵyna túskender kóp bolýy múmkin. Men bul isti tolyǵymen óz baqylaýyma alamyn», - dep otyr Erlan Turǵymbaev.

Vedomstvo basshysy sońǵy jyly ınternet alaıaqtyq sany 2,5 ese artqanyn aıtyp, azamattardy beıtanys adamdarǵa senbeýge, alaıaqtardyń aıla-amaldaryna túspeýge shaqyrdy.