Erlan Turǵymbaev: Týrıstik polıtsııa shtatyn ulǵaıtý josparlanýda
NUR-SULTAN. QazAqparat – QR Іshki ister mınıstri Erlan Turǵymbaev pen Almaty qalasynyń ákimi Baqytjan Saǵyntaevtyń qatysýymen jol qozǵalysy mádenıetin arttyrý máselesi boıynsha jıyn ótti. Bul týraly QazAqparat ІІM baspasóz qyzmetine silteme jasap habarlaıdy.
Sondaı-aq, atalǵan jıynda ІІM basshylyǵy týrıstik polıtsııa shtatyn ulǵaıtý jáne sheteldik azamattar jıi bolatyn jerlerde onyń jańa pýnktterin ornatý týraly usynys jasady.
«Qaýipsizdik salasynda azamattardyń múddelerine qyzmet kórsetý, standarttardy ózgertý jáne qoǵammen ózara is - qımyldy jaqsartý úshin polıtsııanyń servıstik jumys modeline kóshýine baılanysty ishki ister organdarynyń jumysy túbegeıli qaıta qaraldy», - dep atap ótti Erlan Turǵymbaev.
Polıtsııa bólimderinde «front-ofıster» qurylýda - azamattardy qabyldaý úshin qolaıly úı – jaılar belgilenip, halyqty qabyldaý jáne keńes berý kabınetterden tys-kóshelerde, alańdarda jáne aýlalarda júrgiziledi.
El Prezıdenti sondaı-aq, Qazaqstannyń týrıstik áleýeti men ınvestıtsııalyq ahýalyn arttyrý boıynsha mindet qoıdy.
Osyǵan baılanysty barlyq iri qalalarda kóshi-qon ortalyqtary quryldy, al sheteldik qonaqtar men týrıstermen jumys isteý boıynsha polıtsııanyń jekelegen bólimsheleri mamandandyrylyp, olardyń qyzmeti eldiń kórnekti oryndary men kýrorttarynda, mádenı obektilerde týrısterdiń qaýipsizdigin qamtamasyz etýge, habardar etýge, olarǵa keńes berýge baǵyttalǵan.
«Osyny eskere otyryp, týrıstik polıtsııa shtatyn ulǵaıtý jáne sheteldikter jıi baratyn jerlerde onyń jańa pýnktterin ornatý josparlanýda. Sonymen qatar osy qyzmetti materıaldyq-tehnıkalyq jaraqtandyrýdy jaqsartý máselesi qarastyrylýda» - dedi Erlan Turǵymbaev
Mınıstr Almatyny mysalǵa keltire otyryp: «Eger qala boıynsha alsańyz, onda osyndaı polıtsııa pýnktin kún saıyn júzedegen sheteldikter kelip túsip jatatyn halyqaralyq áýejaı aýmaǵynda ornalastyrý qajet. Olardyń keıbiri polıtsııanyń bilikti kómegin qajet etedi, sondyqtan polıtseıdiń shet tilderin erkin meńgerýi jáne kómek kórsetýge quzyrly bolýy óte mańyzdy»- dedi.
Búginde Nur-sultan, Almaty jáne Shymkent qalalarynda, sondaı-aq Aqmola, Almaty, Shyǵys Qazaqstan, Qaraǵandy, Mańǵystaý, Pavlodar jáne Túrkistan oblystarynda týrıstik polıtsııa jumys isteýde.
Eske salsaq, jyl basynda Qazaqstanda týrıstik polıtsııa qurylǵan bolatyn.
