Erlan Turǵymbaev: Prezıdent tapsyrmasyna saı salany jańǵyrtý jumystary atqarylýda
«Elbasy men Memleket basshysynyń tapsyrmasy boıynsha salany jańǵyrtýda birshama jumys júrgizip jatyrmyz. Birinshiden, qoǵammen ózara is-qımyldy jaqsartýdy, polıtsııa qyzmetiniń ashyqtyǵy men aıqyndylyǵyn qamtamasyz etýdi, servıstik úlgige kóshýdi qolǵa aldyq. Osy jumys aıasynda qalalyq jáne aýdandyq polıtsııa bólimderinde HQKO qaǵıdaty boıynsha front-keńseler, sondaı-aq azamattardy qabyldaý úshin jaıly bólmeler ashylýda. Qazirdiń ózinde 174 front-keńse jumys isteıdi. Oǵan kez kelgen azamat habarlasyp, qajetti keńes ala alady. Jumystyń nátıjesi aıqyn. Kún saıyn elimiz boıynsha mundaı qabyldaý bólmelerinde 5 myńnan astam azamatqa qyzmet kórsetiledi. Onda máseleler polıtsııa ǵımaratyna barmaı-aq birinshi deńgeıde jedel túrde sheshiledi. Mundaı jaǵdaılar kezeń-kezeńmen polıtsııanyń barlyq bólimderinde jasalady», - dedi Erlan Turǵymbaev halyqqa esep berý kezdesýinde.
Mınıstrdiń aıtýynsha, sonymen qatar, avtojolda qabyldaý bólmesi jelisimen kún saıyn keń aýqymdy aktsııalardy ótkizý tájirıbesi engizilgen.
«Departamentter men basqarmalardyń basshylary bıýrokratııasyz jáne jazýsyz kósheler men alańdarda kabınetten tys azamattardy qabyldaıdy. Adamdar óz máselelerin formaldy emes jaǵdaıda jedel sheshýge múmkindik aldy. Osy jyldyń sáýir-mamyr aılarynda tek eki aktsııa kezinde 34 myńnan astam adam qabyldanyp, keńes aldy. Olar negizinen jol qozǵalysy erejelerin buzǵany úshin aıyppul tóleý, jol qozǵalysyn uıymdastyrý, kóshi-qon zańnamasyn saqtaý, avtokólikti tirkeý, júrgizýshi kýálikterin berý jáne aýystyrý, avtokólikti qaıta jabdyqtaý tártibi boıynsha keńes aldy», - dedi mınıstr.
Eske sala ketsek, Memleket basshysy Qasym-Jomart Toqaev óziniń saılaýaldy tuǵyrnamasyn júzege asyrý jónindegi is-qımyl Josparyn bekitken bolatyn. Qazaqstan Respýblıkasynyń Prezıdenti «Sabaqtastyq. Ádildik. Órleý» atty saılaýaldy tuǵyrnamasy men «Birge» jalpyulttyq aktsııasynyń barysynda el azamattarynan kelip túsken usynystardy júzege asyrý jónindegi is-qımyl josparyn bekitý týraly Jarlyqqa qol qoıdy. Іs-qımyl jospary birqatar mańyzdy salalarmen birge polıtsııa qyzmetine qoǵamdyq baqylaýdy kúsheıtý sharalaryn qamtıdy.
