Erlan Turǵymbaev: Polıtsııa jumysynyń basty baǵyty - ashyqtyq pen jedeldik
NUR-SULTAN. QazAqparat - Respýblıkalyq «Jolda qabyldaý» jedel aktsııasy barysynda 19 myńǵa jýyq azamatqa keńes berildi. Bul jaıynda QR Іshki ister mınıstri Erlan Turǵymbaev aıtty, dep habarlaıdy QazAqparat tilshisi.
«Qazirgi qazaqstandyq polıtsııanyń ózekti mindetteriniń biri qoljetimdilikti, ashyqtyqty, jedeldilikti arttyrý jáne turǵyndarmen ózara tıimdi baılanys jasaý bolýy tıis. Polıtsııada qazaqstandyqtarmen keri baılanystyń qajettiligine Qazaqstan Respýblıkasynyń Tuńǵysh Prezıdenti - Elbasy aıyryqsha nazar aýdarǵan bolatyn. Osyǵan baılanysty, Іshki ister mınıstrligi turǵyndarmen jumys isteýde aıtarlyqtaı ózgeristerdi qarastyratyn polıtsııany jańa jumys modeline kóshirý boıynsha josparly jumystar júrgizýde. Osy rette ІІM 5-6 sáýir kúnderi jalpy respýblıkalyq «Jolda qabyldaý» jedel aktsııasyn ótkizdi. Bul shara týraly kópshilikke taratý jáne turǵyndardy keńinen qamtý úshin aldyn ala úsh kún buryn barlyq BAQ arqyly turǵyndarǵa aktsııanyń maqsaty, mindeti jáne ótkiziletin oryndary habarlandy», - dedi mınıstr.
Onyń atap ótýinshe, qalalarda jáne aýyldyq jerlerde arnaıy jabdyqtalǵan avtobýstar bazasynda 250-den astam jedel top uıymdastyrylyp, turǵyndarǵa qajetti keńester berdi. Azamattarǵa ózderiniń kezek kúttirmeıtin máselelerin sheshý úshin kúni buryn jazylmaı, kedergisiz, tikeleı polıtsııa departamentteriniń basshylarymen, sondaı-aq ákimshilik, kóshi-qon jáne jergilikti polıtsııa basshylarymen sóılesý múmkindigi jasaldy.
«Kabınetten tys» syrtta beriletin osyndaı keńester azamattarǵa polıtsııamen tikeleı baılanys jasaýyna múmkindik týdyrady, al polıtsııanyń óz kezeginde halyqpen ózara tıimdi is-qımyl jasasýdy qalyptastyrýǵa múmkindik beredi. Qarapaıym azamattar - zeınetkerler, taksı júrgizýshileri, qyzmetshiler úshin resmı emes jaǵdaılarda óz problemalarynyń jedel sheshilýi óte tıimdi boldy. Sonymen «Joldaǵy qabyldaý» aktsııasynyń úsh kúni ishinde azamattarǵa 19 myńǵa jýyq keńes berildi, halyqtan suraqtardyń basym kópshiligi 11 myńnan astamy ekinshi kúni tústi, bul halyqtyń osy aktsııaǵa kóńil aýdarýynyń artqanyn kórsetedi», - dedi ol.
Mınıstr dereginshe, aktsııa qorytyndysynda ákimshilik aıyppuldardy tóleý (4,3 myń), halyqty tirkeý (3 myń), jol qozǵalysyn uıymdastyrý (2,9 myń), avtokólikti tirkeý jáne qaıta jabdyqtaý (2,8 myń jáne 1,7 myń), sondaı-aq júrgizýshi kýáligin berý (2,3 myń) azamattar úshin anaǵurlym ózekti másele ekendigi anyqtalǵan. Sondaı-aq azamattardan polıtsııa qyzmetin jaqsartýǵa, onyń ishinde qoǵamdyq, jol qaýipsizdigi, kóshi-qon jáne basqa da máselelerge baılanysty usynystar jasaldy.
«Bul aǵymdaǵy jylǵy 27 naýryzda Úkimet jáne óńirlik ákimder qatysýymen ótkizilgen keńeste Qazaqstan Prezıdenti Qasym-Jomart Toqaevtyń bılik organdarynyń halyqpen ózara is-áreket jasasýdyń jańa formatyna kóshýi týraly bergen tapsyrmasyna tolyqtaı sáıkes keledi. Budan basqa, ishki ister organdaryn jańǵyrtý barysynda óńirlerde 170-ten astam polıtsııanyń front-ofısteri ashyldy, onda kez kelgen azamat qajetti keńes alady. Jyldyń sońyna deıin front-ofısterdiń sany 250-ge deıin jetetin bolady. Mınıstrlik pen polıtsııa departamentteriniń basshylyǵy apta saıyn azamattardy qabyldaý júrgizedi, qabyldaý kestesi resmı saıt pen áleýmettik jelilerde jarııalanǵan. Bizdiń bastamamyzben ótken «Jolda qabyldaý» aktsııasy turǵyndar úshin qajet boldy. Búginde halyq polıtsııamen tikeleı baılanysty qajet etedi, sondyqtan da osyndaı is-sharalar turaqty túrde uıymdastyrylatyn bolady», - dedi Erlan Turǵymbaev.
