Erlan Turǵymbaev polıtseılerdiń eńbekaqysy qandaı kólemde artqanyn aıtty
NUR-SULTAN. QazAqparat - QR Іshki ister mınıstri Erlan Turǵymbaev polıtseılerdiń eńbekaqysy qandaı kólemde artqanyn aıtty, dep habarlaıdy QazAqparat tilshisi.
Búgin Parlament Senatyndaǵy Úkimet Saǵatynda 2019-2021 jyldarǵa arnalǵan ishki ister organdaryn jańǵyrtý boıynsha Jol kartasyn iske asyrý taqyryby talqylandy.
Jol kartasynyń mańyzdy baǵyty qyzmetkerlerge eńbekaqy tóleý jáne áleýmettik qorǵaý júıesin jaqsartýǵa negizdelgen.
«Únemdelgen qarjy men qosymsha bıýdjetten bólingen 20 mlrd teńge 2019 jylǵy 1 shildeden bastap qyzmetkerlerge jalaqylaryn saralap arttyrýǵa baǵyttaldy. Osy oraıda 65 paıyzǵa patrýldik polıtsııanyń, 55 paıyzǵa jedel-tergeý bólinisteriniń, 25 paıyzǵa ýchaskelik polıtsııa ınspektory, kámeletke tolmaǵandar isteri jónindegi ınspektorlarynyń, sondaı-aq 20 paıyzǵa polıtsııa jáne QAJ qyzmetiniń qalǵan qyzmetkerleriniń eńbekaqysy ósti», - dedi E. Turǵymbaev.
Sonymen qatar ol turǵyn úıdi jalǵa alǵany úshin ótemaqy alatyn qyzmetkerlerdiń tizbesi keńeıtilgendigin jetkizdi.
«Jedel-tergeý bólinisterimen qatar, osy quqyq ýchaskelik, kámeletke tolmaǵandar isteri jónindegi ınspektorlaryna, patrýldik polıtseılerine berilgen. Qazir ótemaqyny 15571 nemese 46,4 paıyz turǵyn úıge muqtaj qyzmetkerler alady», - dedi mınıstr.
