Erlan Turǵymbaev «Nur Otan» partııasynyń alańynda azamattardy qabyldady
«Tikeleı efırde vedomstvo basshysyna óńirlerdegi turǵyndardan beınebaılanys arqyly kóptegen ótinishter tústi. Olar negizinen qylmystyq isterdi tergeýdiń sapasy men merzimderin saqtaýǵa, joǵalǵandardy izdeýge, kóshi-qon zańnamasy men jumysqa qabyldaý máselelerine qatysty boldy. Qabyldaýǵa 2019 jyldyń qazan aıynda Temirtaý – Nur-Sultan tas jolynda jol apatynan qaza bolǵan adamnyń anasy jazyldy. Áıeldiń aıtýynsha, tergeý merzimi keshiktirilip, is birneshe ret toqtatylǵan eken», - dedi resmı ókil ІІM baspasóz qyzmeti alańynda ótken brıfıngte.
Onyń atap ótýinshe, zardap shekken tarap tikeleı mınıstrge júginýinen keıin mınıstrliktiń tergeýshileri júrgizgen qosymsha jumystardyń nátıjesinde isti sotqa joldaýǵa múmkindik týǵan. Qorytyndysynda júrgizýshini bas bostandyǵynan aıyrýǵa úkim shyǵarylǵan.
«Bizdiń qaıǵymyzǵa beı-jaı qaramaǵandardyń barlyǵyna analyq alǵysym sheksiz. Meniń 10 jasar nemerem ákesiz qaldy. Men shyndyq pen shekpenniń abyroıy siz úshin eń qymbat nárse ekenine qýanyshtymyn!» - dep marqumnyń anasy mınıstrge jáne ІІM-niń tergeý tobyna alǵysyn bildirdi», - dedi ol.
Sonymen qatar resmı ókildiń aıtýynsha, elorda turǵyny AQSh-ta turatyn kelinin qujattaý máselesi boıynsha ótinish bildirgen.
Ol Amerıka Qurama Shtatyndaǵy 27 jastaǵy kelini otbasy múshesi retinde ýaqytsha turatynyn jáne júktiliktiń 9-shy aıynda ekenin jetkizdi. Olar Qazaqstannyń Nıý-Iork qalasyndaǵy Bas konsýldyǵyna júgingen kezde oǵan jańa tólqujat rásimdeýden bas tartylǵan. Sebebi ol QR-nyń shet elderdegi mekemeleri arqyly jeke basyn kýálandyratyn qujattar rásimdeý sanatyna kirmeıdi. Álemdegi epıdemıologııalyq jaǵdaıdy, sondaı-aq Qazaqstan azamatshasynyń jaǵdaıyn nazarǵa ala otyryp, ІІM Qazaqstannyń AQSh-taǵy konsýlymen Nıý-Iork qalasyndaǵy Bas konsýldyqta ótinimdi rásimdeý týraly ýaǵdalastyqqa qol jetkizdi», - dedi Nurdildá Oraz.
