Erlan Turǵymbaev mobıldi toptary álsiz jumys júrgizip jatqan óńirlerdi atady
NUR-SULTAN. QazAqparat – Іshki ister mınıstri Erlan Turǵymbaev mobıldi toptary baıaý jumys júrgizip jatqan óńirlerdi atady, dep habarlaıdy QazAqparat tilshisi.
«Atap aıtqanda, «qyzyl» aımaqta ornalasqan Soltústik Qazaqstan, Pavlodar, Aqmola oblystaryndaǵy mobıldi toptardyń jumysy álsiz. Olar 2 nemese 5 zańbuzýshylyqqa deıin anyqtaýda. Al Nur-Sultandaǵy mobıldi toptar bir kúnde ǵana 77 zańbuzýshylyqty anyqtaǵan. Al Almaty qalasy men Almaty oblysynda sońǵy 18 kúnde birde-bir zańbuzýshylyqtyń anyqtalǵany habarlanbady», - dedi Erlan Turǵymbaev Úkimet otyrysynda jasaǵan baıandamasynda.
Mınıstr osyǵan baılanysty óńirlerdegi turǵyndar karantın sharalaryn elemeı ketkenin aıtady. Naqtyraq aıtqanda azamattar maska rejımin saqtamaı, buqara kóp baratyn oryndarda jınalatyn bolǵan.
«Onyń ústine halyq arasynda vırýstyń qaýpi joqtyǵy týraly nemese vaktsınanyń álsizdigi týrasynda jalǵan aqparat kóp tarap ketti. Osynyń bári de memlekettik organdardyń indetpen kúreste salǵan kúsh-jigerin joqqa shyǵarady», - deıdi ol.
