Erlan Turǵymbaev: Mektepterdegi qaýipsizdik júıesine qatysty kemshilikter jyl sońyna deıin joıylady

NUR-SULTAN. QazAqparat – Elimizdiń bilim berý uıymdaryndaǵy qaýipsizdik júıesine qatysty kemshilikter jyl sońyna deıin joıylady. Bul týraly búgin QR Parlamenti palatalarynyń birlesken otyrysynda Іshki ister mınıstri Erlan Turǵymbaev aıtty, dep habarlaıdy QazAqparat tilshisi.

«Balalardyń qaýipsizdigi - óte ózekti másele. ІІM birqatar is-shara qabyldady. Birinshiden, zańǵa ózgertý engizildi. Balalarǵa qatysty zorlaý, seksýaldy qylmystar úshin jaýapkershilik pen jaza kúsheıtildi. Jaza merzimi uzartyldy, endi bul bap boıynsha tatýlasý múmkin emes jáne merziminen buryn bosatylmaıdy. Ekinshisi – aldyn alý máseleleri. Qazir kámeletke tolmaǵandardyń isi boıynsha ınspektorlardyń sany 448-ge deıin arttyryldy. Endi ár qalada, ár aýmaqta, ár aýdanda osyndaı ınspektor bolady. Olar jergilikti atqarýshy organdarmen birge aldyn alý is-sharalardy júzege asyrady», - dedi mınıstr otyrys barysynda depýtattardyń saýalyna oraı.

Onyń atap ótýinshe, Tatarstannyń Qazan qalasynda oryn alǵan oqıǵaǵa baılanysty Memleket basshysynyń tapsyrmasy bar.

«Mektepterdegi qaýipsizdik is-sharalary boıynsha memlekettik organdarmen birge jumys istep jatyrmyz. Eń aldymen bilim berý organdarymen birge 7 500 mektepti tekserdik, 100 paıyzynda beınebaqylaý kamerasy bar. Biraq, 45 paıyzy ǵana tehnıkalyq standartqa saı keledi. Basqa da kemshilikter bar. Mektepterdiń 30 paıyzynda dabyl júıesi joq, týrnıketter men temir izdeıtin qurylǵylar 5 paıyzynda ǵana bar, 6 paıyzynda ǵana kúzet uıymdary jumys isteıdi. Búgingi tańda Іshki ister mınıstrligi Bilim jáne ǵylym mınıstrligimen, jergilikti atqarýshy organdarmen birge jumys istep jatyr. Qarjy bólinedi. Jyl sońyna deıin osy kemshilikterdi joıamyz dep oılaımyn», - dedi Erlan Turǵymbaev.