Erlan Turǵymbaev qyrǵyz, ózbek jáne tájikstandyq áriptesterimen keńes ótkizdi
NUR-SULTAN. QazAqparat – QR Іshki ister mınıstri Erlan Turǵymbaev Qyrǵyzstan, Tájikstan jáne Ózbekstan elderindegi áriptesterimen keńes ótkizdi, dep habarlaıdy QazAqparat tilshisi.
QR ІІM baspasóz qyzmetinen habarlanyp otyrǵandaı, 8-10 tamyz kúnderi aralyǵynda Almatyda Qazaqstan, Qyrǵyzstan, Tájikstan men Ózbekstan Respýblıkalary ishki ister mınıstrleriniń ekinshi keńesi ótedi. Іs-shara aımaqtaǵy qaýipsizdikti qamtamasyz etý boıynsha yntymaqtastyqty nyǵaıtý sheńberinde ótkiziledi. Atalǵan elderdiń Memleket basshylary byltyr 15 naýryzda elordada ótken kezdesýde osyndaı ózara is-qımyldyń jańa formatyna bastamashylyq etken bolatyn.
Keńes jumysyna Qazaqstan Іshki ister mınıstri E.Turǵymbaev, Tájikstan Іshki ister mınıstri R. Rahımzoda, Ózbekstan Іshki ister mınıstri P. Bobojonov, Qyrǵyzstan ókili A. K. Dolosbaev, ishki ister mınıstrlikteriniń ortalyq apparattarynyń, sondaı-aq shekara mańyndaǵy ishki ister organdary qyzmetteriniń basshylary qatysty. Kezdesý barysynda ishki ister organdarynyń zańsyz kóshi-qonǵa qarsy is-qımyl, qylmyskerlerdi izdestirý salasyndaǵy yntymaqtastyq, sondaı-aq bóten múlikti urlaýǵa qarsy áreket, shekara mańyndaǵy óńirlerdiń ózara is-qımylynyń ózekti máseleleri qaraldy.
«Sholpan-Ata qalasynda ótken birinshi keńesten beri bir jyl ótti. Búgingi tańda ótken jylǵy kezdesýde qol jetkizilgen, birlesken kelisimder, ásirese shekara mańyndaǵy óńirlerde yntymaqtastyqty nyǵaıtýda qosymsha serpin berdi dep aıtýǵa barlyq negiz bar. Biz qyrǵyz, tájik jáne ózbek áriptestermen ekijaqty negizde de, kópjaqty formatta da jemisti yntymaqtastyq ornattyq. TMD keńistiginde, ShYU jáne basqa da birqatar halyqaralyq uıymdar sheńberinde qylmysqa qarsy kúrestiń birlesken baǵdarlamalaryn iske asyrýdamyz. Qazirgi kezde esirtki qylmysyna, terrorızmge jáne ekstremızmge, zańsyz kóshi-qonǵa, sondaı-aq transulttyq uıymdasqan toptardyń qyzmetine baılanysty kúsh-jigerimizdi biriktirýimiz kerek. Árıne, munda keshendi tásil, bizdiń strategııamyzdy jáne ózara is-qımyl taktıkasyn jetildirý qajet. Osy turǵydan alǵanda, bizdiń keńes – problemalyq máselelerdi talqylaý jáne yqtımal qaýipterdiń aldyn alýǵa baǵyttalǵan ýaqtyly sheshimder qabyldaý úshin qolaıly alań bolyp tabylady», - dep atap ótti Erlan Turǵymbaev.
Otyrys qorytyndysy boıynsha, ishki ister mınıstrleri keńes Hattamasyna qol qoıdy.
Budan basqa, delegatsııa basshylary transshekaralyq qylmysqa qarsy kúreste Ortalyq Azııa óńiri memleketteriniń ishki ister organdarynyń kúsh-jigerin úılestirýge arnalǵan óńirlik konsýltatıvtik-keńesshi organ retinde Keńes qyzmetiniń quqyqtyq negizderin bekitti.
