Erlan Turǵymbaev qaza tapqan polıtseılerdiń otbasylaryna kóńil aıtty

NUR-SULTAN. Qazaqparat - Іshki ister mınıstri Erlan Turǵymbaev qaza tapqan polıtseıler Qanat Otarbaev pen Qanat Hamıdýllınniń otbasylaryna kóńil aıtty, dep habarlaıdy QazAqparat ІІM silteme jasap.

«Olardyń kásibıligi men parasattylyǵyn, óz qyzmetine adaldyǵyn basshylyq ta, halyq ta baǵalaǵan. Olar áriptesteriniń arasynda syıly boldy. Іshki ister organdarynyń barlyq jeke quramy qaza tapqandardyń týystary men jaqyndarymen birge qaıǵyrady», – dedi mınıstr Erlan Turǵymbaev.

Aıta ketsek, polıtsııa kapıtany Qanat Aıdarbekuly Otarbaev ishki ister organdarynda 16 jyl qyzmet etken. Artynda jubaıy men úsh balasy qaldy, olardyń eń kishisi 3 jasta. Polıtsııa kapıtany Qanat Bolatuly Hamıdýllın ishki ister organdarynda 12 jyl qyzmet etken. Marqumnyń artynda júkti áıeli men jeti jasar uly qaldy.

Búgin túnde Aqmola oblysynda jol apaty bolyp, polıtsııa qyzmetkerleri kóz jumdy.