Erlan Turǵymbaev ishki ister organdarynda engizilip jatqan aqparattyq tehnologııalar jaıynda aıtty
«Halyqtyń senimi – polıtsııa jumysynyń negizgi baǵasy. Sol úshin Іshki ister mınıstrligi aqparattyq tehnologııalardy engizýde. Qaǵaz anyqtamalardy joıyp, barlyq memlekettik qyzmetterdi elektrondy júıege kóshirý jumysy júrip jatyr. Mysaly, 2019 jyly jalpy 24 mln qyzmet kórsetildi. Bul birinshiden, sybaılas jemqorlyqty joıady. Ekinshiden, qarapaıym azamattardyń ýaqytyn únemdeıdi. Úshinshiden, «Elektrondyq úkimet» portaly arqyly úıde otyryp máselesin sheshedi», - dedi mınıstr Ortalyq kommýnıkatsııalar qyzmetinde ótken kezdesýde.
Osy rette ol naqty nátıjelerge toqtaldy.
«Mekenjaı anyqtamalaryn berýdi toqtattyq. Buryn osy anyqtamany alý úshin jylyna 10 mln adam kezekte turatyn. Osy jyldyń 1 qańtarynan bastap, elimizge ýaqytsha kelgen sheteldikter tirkeýden ótpeıdi. Shaqyrý bergender kóshi-qon qyzmetine ózderi habarlasýy tıis. Іshki ister mınıstrligi kórsetetin qyzmetterdiń 83 paıyzy elektrondy formatqa aýysty. Jyl sońyna deıin kóshi-qon salasy boıynsha taǵy birneshe qyzmet túri onlaın júıege kóshedi», - dedi Erlan Turǵymbaev.
Onyń atap ótýinshe, qyzmetkerler men azamattardyń arasynda tikeleı baılanys bolmaýy úshin Arnaıy halyqqa qyzmet kórsetý ortalyqtaryndaǵy tirkeý-emtıhan bólimderi jabylyp, Halyqqa qyzmet kórsetý ortalyqtaryna berilgen.
«Júrgizýshi kýáligi, nómir berý, kólikti tirkeý, synaq tapsyrý barlyǵy sol ortalyqtarda júzege asady. Bul sybaılas jemqorlyqty boldyrmaıdy. Avtomattandyrý júıesin 91 paıyzǵa jetkizýdi josparlap otyrmyz», - dedi mınıstr.