Erlan Turǵymbaev Іshki ister mınıstrliginde qyzmet etetin qyz-kelinshekterdi quttyqtady
ASTANA. QazAqparat - Halyqaralyq áıelder kúnine oraı, QR Іshki ister mınıstri Erlan Turǵymbaev QR Іshki ister organdarynyń qyzmetkerleri, ardager áıelderdi jáne jumys barysynda mert bolǵan qyzmetkerlerdiń jubaılaryn quttyqtady, dep habarlaıdy QazAqparat tilshisi.
«Halyqaralyq áıelder kúni - kóktemniń alǵashqy meıramy, áıeldiń teńdigi men sán-saltanatynyń belgisi. Árbir kóktem - tabıǵattaǵy jańa ómirdiń bastaýy bolsa, árbir áıel - otbasynyń uıytqysy, qoǵamnyń, memlekettiń jáne álemniń eń ásem tulǵalary. Kásibı sheberlikterińizben jáne qyzmetterińizdi adal atqarý arqyly qoǵamdyq tártipti saqtaýǵa, qylmyspen kúresýge, azamattardyń konstıtýtsııalyq quqyqtary men bostandyǵynyń saqtalýyna úles qosyp kelesizder», - dedi mınıstr Erlan Turǵymbaev.
Saltanatty sharada mınıstr jumys barysynda mert bolǵan mılıtsııa kishi leıtenanty Janaıdar Jırentaevtyń áıeli - Nazken Jırentaevany jáne polıtsııa kapıtany bolǵan Marǵulan Qonaevtyń jubaıy - Záýre Isenovany 8 naýryz merekesimen quttyqtady.
«Meniń kúıeýim Janaıdar Jırentaev 1994 jyly qaýipti qylmyskerlerdi ustaý kezinde mert boldy. Sodan beri 25 jyl ótti. Qanshama kóz jasy tógildi. Orny tolmas qaıǵy eńserilmeıtindeı kórindi. Biraq, Janaıdardyń dostary, áriptesteri únemi janymyzdan tabyldy. Meıramdarda bizdi umytqan emes. Áke jolyn búginde qyzymyz Dınara men kúıeý balamyz jalǵastyryp keledi. Janaıdardyń atyna kóshe berildi, eske alý taqtasy qoıyldy. Munyń barlyǵy - mınıstrliktiń, ofıtserlerdiń qamqorlyǵy, bizge degen yqylasy. Sondyqtan, analar men qaza tapqan batyrlardyń jubaılary atynan alǵys aıtamyn», - dedi Nazken Jırentaeva.
Vedomstvonyń baspasóz qyzmetiniń habarlaýynsha, QR Іshki ister organynda 159 myń adam jumys isteıdi jáne 14 myńǵa jýyǵy - áıelder.
Búgin mınıstrdiń buıryǵymen Qazaqstannyń túkpir-túkpirindegi 500 qyzmetker óz qyzmetin adal atqarǵany úshin marapattalady.
