Erlan Turǵymbaev blokposta kóz jumǵan polıtseıler týraly aıtty
NUR-SULTAN. QazAqparat - QR Іshki ister mınıstri Erlan Turǵymbaev qyzmettik boryshyn óteý barysynda qaza tapqan polıtsııa aǵa leıtenanty Jaras Janǵazıev pen polıtsııa serjany Dastan Ábdiqanovtyń otbasyna kóńil aıtty, dep habarlaıdy QazAqparat.
«Qaıǵyly jaǵdaıda qaza tapqan polıtseıler tótenshe jaǵdaıdyń erekshe rejıminde 2 aıdan astam ýaqyt jumys istedi. Olar kúndelikti qyzmetterinde karantındik sharalardy qamtamasyz etip, qoǵamdyq tártipti qorǵady. Aǵa leıtenant Jaras Janǵazıev Almaty qalasynyń patýrldik polıtsııa polkiniń ınspektory bolyp jumys istedi. 19 jyl boıy qyzmettik mindetterin abyroımen atqaryp, minsiz qyzmeti úshin birneshe márte yntalandyryldy, onyń ishinde vedomstvolyq nagradalar aldy. Kóptegen jas polıtseıler úshin tálimger ári úlgi bola bildi. Jaras Janǵazıev óz isiniń kásibı mamany ǵana emes, sonymen birge jaqsy áke edi. Onyń artynda eki qyzmen úshinshi sábılerin kútken jary qaldy», - dedi Erlan Turǵymbaev vedomstvonyń Telegram kanalynda .
Mınıstrdiń atap ótýinshe, polıtsııa serjanty Dastan Ábdiqanov 4 jyldyq qyzmet jolynda ózin jaýapkershiligi mol, ustanymy berik ári tyńǵylyqty oryndaýshy qyzmetker retinde kórsete bildi. Ótken jyly ǵana shańyraq kóterdi jáne bir aı buryn ǵana qyzy dúnıege kelgen bolatyn.
«Ókinishke oraı, qaıǵyly oqıǵa olardyń ómirin qıp ketti. Eki qyzmetker de úzdikterdiń qatarynda edi jáne Otanymyzǵa áli de kóp eńbek sińire alatyn. Іshki ister mınıstrliginiń barlyq jeke quramy olardyń týǵan-týystarymen birge aza tutady. Barlyǵymyz úshin bul orny tolmas qaza bolyp otyr», - dedi ol.
Eske salsaq, Almaty oblysy aýmaǵyndaǵy blokposta bolǵan kólik apatynan eki polıtseı kóz jumǵanyn, olardyń artynda jary men balalary qalǵanyn habarlaǵan edik.
