Erlan Turǵymbaev: Azamattardyń barlyq ótinishterine jedel áreket etý kerek
NUR-SULTAN. QazAqparat - Іshki ister mınıstri Erlan Turǵymbaev Ózindik qaýipsizdik departamentine ishki ister organdary qatarynda tártip pen zańdylyqty arttyrý boıynsha jumysty jalǵastyrýdy tapsyrdy.
Bul týraly QR Іshki ister mınıstrliginiń baspasóz qyzmeti habarlady.
Baspasóz qyzmeti taratqan málimetterge qaraǵanda, ІІM-de mınıstrdiń basshylyǵymen barlyq óńirlik bólinisterdegi ÓQB bastyqtarynyń qatysýymen keńes ótti.
Vedomstvo basshysy óz qatarlarynda quqyq buzýshylyqtyń aldyn alý jáne jolyn kesý boıynsha ótken jyly úlken jumystar atqarylǵanyn atap ótti. El boıynsha jeke quram arasyndaǵy, onyń ishinde sybaılas jemqorlyq sıpatyndaǵy qylmys is júzinde úshten birine qysqardy.
Vedomstvo basshysy aǵymdaǵy jyly qyzmetkerlerdiń jaýapkershiligin arttyrý baǵytyndaǵy jumysqa erekshe nazar aýdarý qajettigin atap ótti.
«Quqyq qorǵaý organdarynyń qyzmetkerleri bizdiń halqymyzdyń tynyshtyǵy men qaýipsizdigin kúzetý jolynda qyzmet atqarady. Qazaqstannyń árbir azamaty polıtseıdiń qorǵaýynda. Bul úlken jaýapkershilik. Biraq bul ishki ister organdarynyń qyzmetkerlerine beriletin erekshe mártebe men ókilettikter. Sondyqtan men Ózindik qaýipsizdik departamentine tek polıtseılerdiń zańdylyqty saqtaýyn qamtamasyz etip qana qoımaı, sondaı-aq olardy qorǵaýdy tapsyramyn», - dedi mınıstr Erlan Turǵymbaev.
Mınıstr Ózindik qaýipsizdik departamentiniń aǵymdaǵy jylǵy basym mindetterin belgiledi: polıtsııa tarapynan quqyq buzýshylyqtyń barlyq túrleriniń aldyn alý, óz qatarynda turmystyq sybaılas jemqorlyqty joıý. Sondaı-aq, ózindik qaýipsizdik bólimsheleriniń basshylaryna polıtseılerdiń zańsyz is-áreketteri faktileri boıynsha azamattardyń barlyq ótinishterine jedel den qoıýdy tapsyrdy.
Memleket basshysynyń Qazaqstan polıtsııasy jumysynyń servıstik modeline kóshý jónindegi tapsyrmalaryn oryndaý úshin ІІM-niń qoǵam senimin nyǵaıtý boıynsha sharalar qabyldanǵanyn atap ótý qajet.
Sybaılas jemqorlyqqa qarsy turaqty ımmýnıtetke basa nazar aýdara otyryp, basshylyq laýazymdarǵa úmitkerlerge qoıylatyn talaptar arttyryldy. ІІM kadr komıssııasy arqyly ótken 600 úmitkerdiń 80-i maquldanbady. Barlyq deńgeıdegi basshylardyń jaǵdaıǵa da, jeke quramǵa da jaýapkershiligi kúsheıtildi.
Budan basqa, azamattyq qoǵammen ózara is-qımyldy keńeıtýge, jurtshylyqpen tikeleı dıalogty jáne keri baılanysty qamtamasyz etý baǵytynda sharalar qabyldanýda.
«Elimizdiń azamattary ishki ister organdarynyń qyzmetkerlerine júgingende, olar túsinistikti, ózine degen adamgershilik qarym-qatynasty, sondaı-aq olardyń quqyqtary men bostandyqtary laıyqty qorǵalatynyna senimdi bolýy úshin eń qatań standarttar men talaptardy ustaný qajet», - dep atap ótti vedomstvo basshysy.
