Erlan Turǵymbaevqa qatysty sot úkimi shyqty

ASTANA. KAZINFORM – Burynǵy Іshki ister mınıstri Erlan Turǵymbaevqa qatysty sot úkimi jarııalandy. Bul aqparatty Astana qalalyq sotynyń baspasóz qyzmeti rastady.

Eks-sheneýnikke qatysty qylmystyq isti Astana qalasynyń qylmystyq ister jónindegi aýdanaralyq soty aýyr zardaptarǵa ákep soqtyryp, bılikti asyra paıdalandy degen aıyp boıynsha qarady.

«Bul is protsedýralyq kelisimmen kinásin moıyndaý «qupııa» belgisimen keldi. Sondyqtan is jabyq formatta qaraldy. Sotta prokýror aıypty qoldap, sottan 5 jylǵa bas bostandyǵynan aıyrý jazasyn taǵaıyndaýdy surady», – delingen habarlamada.

Sottalýshy kinásin tolyq moıyndap, óz isine ókingen.

Sot úkimimen eks-mınıstr qylmys jasaǵany úshin kináli dep tanylyp, belgili bir laýazymdardy atqarý quqyǵynan 10 jylǵa aıyra otyryp, 5 jylǵa bas bostandyǵynan aıyryldy.

«E. Turǵymbaevqa sybaılas jemqorlyq qylmys belgileri joq aıyp taǵylǵandyqtan, Qylmystyq kodekstiń 63-babynyń negizinde taǵaıyndalǵan jazany shartty dep sanaý týraly qaýly etildi. Bul rette sot sottalýshynyń kinásin moıyndaýyn, onyń shyn júrekten ókingenin jáne alǵash ret qylmys jasaǵanyn eskerdi», - delingen habarlamada.

Sondaı-aq, sot QR Prezıdentine eks-mınıstrdi arnaýly ataqtan jáne memlekettik nagradalardan aıyrý týraly usynys engizý týraly sheshim qabyldady.

Úkim zańdy kúshine engen joq.

Eske sala keteıik, burynǵy Іshki ister mınıstri Erlan Turǵymbaev bıyl sáýirde ustaldy.

Keıin eks-sheneýniktiń eki aıǵa qamaýǵa alynǵany habarlandy.

19 shildede burynǵy ishki ister mınıstri Erlan Turǵymbaevtyń isi sotqa túsken edi.