Erlan Syzdyqov: «AMANAT» kópshilikke halyq qoldaıtyndaı uran tastaı alýy kerek
NUR-SULTAN. QazAqparat – L.N.Gýmılev atyndaǵy Eýrazııa ulttyq ýnıversıtetiniń rektory, QR UǴA akademıgi Erlan Sydyqov «AMANAT» partııasynyń transformatsııasy týraly óz paıymyn aıtty, dep habarlaıdy QazAqparat tilshisi.
«Taıaý arada Memleket basshysy, partııa lıderi Qasym-Jomart Kemeluly Toqaevtyń usynysy boıynsha partııanyń sezi shaqyryldy. Ondaǵy basty jańalyq – partııanyń aty ózgerdi. Aty ózgerdi degen sóz – onyń aldyndaǵy tapsyrma boıynsha zaty ózgeredi degen sóz. Óıtkeni Prezıdenttiń, partııa lıderiniń aıtýy boıynsha, endigi Jańa Qazaqstanda kóptegen partııalar týyndaıdy. Ol sózsiz. Jyldyń aıaǵynda partııanyń serkesi qyzmetinen ketetinin de aıtyp qaldy. ıAǵnı, partııalardyń bári ortaq báseke alańyna shyǵady. Ana partııa meniki, myna partııa seniki degen bolmaıdy. Pikirtalas, saıası talas týyndaıdy. Osylaısha ósemiz. Ol úshin uıymdastyrylǵan, qoldan jasalǵan partııalar emes, naǵyz halyqtyń oıyn aıta alatyn, el ishinen, tómennen kóterilgen partııalar kóbirek kerek. Odan qorqatyn eshteńe joq. Qoǵam bireý, memleketimiz bireý, halqymyz bireý. Osylardyń bárin jetildirýdiń bir ǵana joly bar. Báseke arqyly...», - dedi ǵalym.
Rektordyń paıymynsha, osy ýaqytqa deıin «AMANAT» jeńimpaz partııa bolyp keldi.
«Parlament pen Úkimettiń negizinde osy partııa ókilderi tur. Al endigi jaǵdaıda sol pozıtsııasyn ustap qala ala ma? Kóshbasshy partııa bola ala ma? Ony bolashaq kórsetedi. Ózgere ala ma, Jańa Qazaqstanǵa laıyqty bola ala ma, halyq qoldaıtyndaı uran tastaı ala ma? Bári soǵan baılanysty.
Osy sezde Prezıdent bıýrokratııadan qutylý kerektigin aıtty. Partııada bıýrokratııa beleń alyp ketken edi, shynymen. Kezinde Reseı Federatsııasynyń Premer-Mınıstri bolǵan Vıktor Chernomyrdın degen saıasatkerdiń aıtqan sózi bar. «Reseıde qandaı partııa qursań da, KPSS bolyp shyǵady» degen sózi taraǵan. Bizde de soǵan jaqyndap qalǵan kez boldy. Bıýrokratııa tym kóbeıip ketti. Olaı bolmaýy kerek. Baǵdarlamany joǵarydan qurmaıdy. Eldiń ishindegi oı-pikirden baǵdarlama týyndaıdy. Sony oryndaýǵa qaýqarly Úkimet qurylýy kerek. Ár partııa soǵan laıyq bolýǵa tyrysýy kerek», - dedi Erlan Sydyqov.
