Erlan Sydyqov: Eýrazııa ulttyq ýnıversıtetiniń jańa ǵımaraty salynady
«Elimizde jaqsy úrdis bar, ata-analary balalaryn joǵary oqý ornynda oqytýǵa tyrysady. Osy oraıda ýnıversıtette oqýǵa nıetti stýdentter úshin jaǵdaı jasaý kerek. Bizdiń ýnıversıtet 11 myń orynǵa arnalǵan, qazirdiń ózinde 20 myńǵa jýyq stýdent bilim alyp jatyr. Aldaǵy jyly bizge túsetin stýdentter sany arta túsedi degen esepteýler boldy. Sondyqtan 25 myń sharshy metrge eseptelgen oqý-zerthanalyq keshenniń qurylysyn bastaýdy josparǵa engizdik», - dedi rektor.
Onyń aıtýynsha, bul keshende zerthana, oqytý korpýsy, kitaphana qamtylady. Joba memlekettik-jekeshelik seriktestik esebinen júzege asyrylady.
«Alaıda ınvestorǵa osydan qandaı paıda túsedi? Bul turǵyda ol jer teliminiń bir bóligine ózine qajetti nysandy salady. Degenmen ınvestordyń osy jerge dúken nemese túngi klýb salýyna ruqsat bermedik. Osy oraıda bizge kerek zamanaýı emhananyń qurylysyn salýdy talap ettik. Sebebi ýnıversıtette 20 myń stýdent pen qyzmet etetin adamdar bar», - dep túsindirdi E. Sydyqov.
Oqý-zerthanalyq keshenniń qurylysy 2021 jyldyń kókteminde bastaý josparlanyp otyr.
Sonymen qatar ol ýnıversıtet stýdentteri úshin jataqhana salýǵa ınvestorlar tartylǵanyn aıtty.
«Investorlarǵa jataqhana salý tıimsiz ekenin túsiný kerek. Alaıda olardy kóndirýge týra keldi. Osy oraıda ýnıversıtettiń bedeliniń arqasynda kelisimge qol jetkizildi. Qazir olar 2,5 myń orynǵa arnalǵan jataqhana salyp jatyr», - dedi EUÝ rektory.
Aıta keteıik, búgin L.N. Gýmılev atyndaǵy EUÝ-de óziniń sanaly ǵumyrynyń basym bóligin qazaq halqynyń shyǵý tegi men geneologııasyna arnaǵan zertteýshi, QR UǴA akademıgi Orazaq Smaǵulov pen kórnekti ǵalym-antropolog Aınagúl Smaǵulovanyń «Qazaq halqy jáne ata tegi» atty kitabynyń tanystyrylymy ótti.
