Erlan Sydyqov «Avtorlyq Prime-Time jastar televıdenıesin» qalyptastyrýdy usyndy
ASTANA. QazAqparat - Otandyq telearnalardyń birinen «Avtorlyq Prime-Time jastar televıdenıesin» qalyptastyrý qajet. Mundaı usynysty búgin halyq aldyndaǵy eseptik kezdesýin ótkizgen L.Gýmılev atyndaǵy Eýrazııa ulttyq ýnıversıtetiniń rektory Erlan Sydyqov jasady, dep habarlaıdy QazAqparat.
«Kez kelgen oqý ornynyń maqsaty - qoǵammen tyǵyz baılanysta bolý. Qoǵam - bizdiń ári tiregimiz, ári tilegimiz. Baǵalaýshymyz da - qoǵam, baǵyttaýshymyz da - qoǵam. Sonymen birge qoǵam bilim júıesiniń, ásirese joǵary mekteptiń órkendeýine asa múddeli. Óıtkeni bilim men ǵylym - qoǵamnnyń baǵdarshamy. Osy rette ýnıversıtet pen qoǵamnyń arasyndaǵy altyn kópir - buqaralyq aqparat quraldary», - dedi ýnıversıtet basshysy.
Sonymen qatar ol bir jyl ishinde ýnıversıtettiń baǵyt-baǵdaryn, tabystaryn qoǵamǵa keńinen jetkizgen gazet-jýrnaldarǵa, televıdenıe-radıoǵa, ınternet saıttary men áleýmettik jelilerge sheksiz rahmetin aıtty.
«Áleýmettik-mádenı ómirdiń qaınaýynda turǵan ýnıversıtet Elordany ǵana emes, tutas eldi ǵylym-bilim, mádenıet turǵysynan sýsyndatýǵa qabiletti ekenin taǵy da bir esterińizge salamyz. Men BAQ-taǵy áriptesterimizge, ózimizdegi mamandarǵa otandyq telearnalardyń birinen «Avtorlyq Prime -Time jastar televıdenıesin» qalyptastyrýdy usynamyn. Aqyl qossaq, kúsh biriktirsek, bul oıdyń júzege asatynyna tolyq senemin», - dedi Erlan Sydyqov.
