Erlan Saıyrov: Prezıdenttikke úmitkerlerdiń debaty - eldi demokratııalandyrýdaǵy úlken qadam

NUR-SULTAN. QazAqparat - Belgili saıasattanýshy Erlan Saıyrov «Habar» arnasynda tikeleı efırde ótken QR Prezıdenttigine kandıdattardyń debatyna qatysty pikirin bildirdi.

«Mundaı saıası pikirsaıys dúnıejúzilik praktıkada árbir saılaý protsesiniń negizgi atrıbýty bolyp tabylady. Bizdiń elimizde Saılaý týraly zańǵa sáıkes, debat ótkizý negizi mindetti emes. Sondyqtan, búgingi debatty elimizdegi demokratııalandyrý jáne saıası júıeni lıberalızatsııa jasaý jolyndaǵy úlken qadam dep aıtýǵa bolady», - dedi saıasattanýshy QazAqparat tilshisine.

Ol sondaı-aq, pikirtalasqa qatysýshylardyń efır barysynda erekshe belsendi bolǵanyn atady. «Debattyń ózine keletin bolsaq, jan-jaqty, qyzý pikirtalas túrinde ótti. Árbir úmitker, úmitker shtabynyń basshylary el damýynyń ekonomıkalyq-áleýmettik aspektilerine toqtalyp, eldegi qordalanyp qalǵan problemalardy sheshýge qatysty óz oılaryn ashyq aıtty. Meniń oıymsha, bul debat - saıası mádenıetimizdiń ósýindegi úlken bir beles», - dedi ol.

Eske salaıyq, búgin «Habar» arnasynda Qazaqstan Respýblıkasy Prezıdenttigine úmitkerler arasynda tikeleı efırde pikirtalas ótti.

Eske salsaq, Ortalyq saılaý komıssııasy QR Prezıdenttigine 7 kandıdatty tirkegen bolatyn. Olar: «Nur Otan» partııasynan Qasym-Jomart Toqaev, «Uly dala qyrandary» respýblıkalyq qoǵamdyq mádenı-áleýmettik birlestiginen Sádibek Túgel, «QR Kásipodaqtar federatsııasy» respýblıkalyq kásipodaqtar birlestiginen Amangeldi Taspıhov, «Aq jol» Qazaqstannyń demokratııalyq partııasynan Danııa Espaeva, «Aýyl» halyqtyq-demokratııalyq patrıottyq partııasynan Tóleýtaı Raqymbekov, Qazaqstannyń kommýnıstik halyq partııasynan Jambyl Ahmetbekov jáne «Ult taǵdyry» respýblıkalyq qoǵamdyq birlestiginen Ámirjan Qosanov.