Erlan Saıyr Soltústik pen Shyǵystan halyqtyń kóshý sebebin atady
ASTANA. KAZINFORM — Soltústik pen Shyǵystan halyqtyń kóshý sebebi — aımaqtardyń gazdandyrylmaýy. Bul týraly búgin Quryltaı otyrysynda Energetıka mınıstrine saýal joldaǵan depýtat Erlan Saıyr aıtty.
— Saılaý aldyndaǵy kezdesýler barysynda Soltústik Qazaqstan, Aqmola, Pavlodar, Abaı, Shyǵys Qazaqstan oblystary turǵyndary «Ádilet» partııasy ókilderine osy aýmaqtardy gazdandyrý máselesin kóterýdi birneshe ret surady. Soltústik jáne Shyǵys óńirlerdi gazdandyrý, atap ótkenimizdeı uzaq merzimdi strategııalyq josparlarda kózdelgen. Degenmen, 2026 jyly praktıkalyq konfıgýratsııa ózgere bastady: soltústik baǵyt boıynsha Petropavl, Kókshetaý jáne Astanany gazben jabdyqtaýǵa baǵdarlanǵan «Esil — Astana» magıstraldyq gaz qubyrynyń jeke jobasy jasalyp jatyr, — dedi depýtat.
Onyń málimetinshe, Qazaqstannyń Soltústik-Shyǵys ekonomıkalyq makro-aımaǵynda jalpy 3,5 mln adam turady, Elimizdiń agrarlyq salasy óniminiń 46-paıyzyn, ónerkásip óniminiń 21-paıyzyn óndiredi. Soǵan qaramastan 2025 jyly kóship kelýshiler men kóship ketýshiler arasynda keri saldo 27 myń adam boldy.
— Onyń basty sebepteriniń biri — aımaqtardyń gazben qamtylmaýy, — dedi Erlan Saıyr.
Osyǵan oraı depýtat halyqty gazben qamtý áleýmettik asa mańyzdy másele ekenin eskere otyryp, kelesi qadamdardy iske asyrý qajet dep esepteıdi.
— Memleket basshysynyń tapsyrmasyna sáıkes, Soltústik- shyǵys ekonomıkalyq aımaǵyn gazdandyrýdy tezdetý;
— qubyr tartý úshin memlekettik-jekeshilik áriptestik, jeke ınvestıtsııa kózderin tartý;
— elimizde ishki gaz kózderin izdestirýdi tereńdetý;
— halyq arasynda bul máseleniń sheshilý tetikteri men merzimderi jóninde túsindirme jumystaryn júıeli júrgizý.
Buǵan deıin depýtat Aısulý Súleımen pılotsyz avıatsııany damytý úshin biryńǵaı tsıfrlyq júıe qurýdy usynǵan edi.
