Erlan Sársembaev Ádilet mınıstri bolyp taǵaıyndaldy

 ASTANA. KAZINFORM – Memleket basshysynyń Jarlyǵymen Erlan Sársembaev Ádilet mınıstri bolyp taǵaıyndaldy. Bul týraly Aqordanyń baspasóz qyzmeti habarlady.

– Memleket basshysynyń Jarlyǵymen Erlan Jaqsylyquly Sársembaev Qazaqstan Respýblıkasynyń Ádilet mınıstri laýazymyna taǵaıyndaldy, - delingen habarlamada.

Erlan Jaqsylyquly Sársembaev 1975 jyly Almaty oblysy Talǵar aýdany Oktıabr aýylynda dúnıege kelgen.

1997 jyly Almaty energetıka jáne baılanys ınstıtýtyn «Radıoınjener» mamandyǵy boıynsha, al 2000 jyly D.Qonaev atyndaǵy gýmanıtarlyq ýnıversıtetti bitirgen.

2002 jyldan 2005 jylǵa deıin Premer-mınıstr keńsesiniń qorǵanys jáne quqyqtyq tártip bóliminiń keńesshisi, sektor meńgerýshisi qyzmetin atqardy.

2005 jyldan 2011 jylǵa deıin Senat apparatynda jumys istedi. Halyqaralyq ister, qorǵanys jáne qaýipsizdik komıtetimen ózara is-qımyl jónindegi bólim meńgerýshisiniń orynbasary, sondaı-aq áleýmettik-mádenı damý komıtetimen ózara is-qımyl jónindegi bólim meńgerýshisi laýazymdaryn atqardy.

2011 jyldan 2016 jylǵa deıin Ulttyq qaýipsizdik organdarynda qyzmet atqardy. Onda ulttyq qaýipsizdik komıteti (UQK) Zań departamenti bastyǵynyń orynbasary jáne bastyǵy laýazymdaryn atqardy.

2016-2017 jyldar aralyǵynda Parlament Senatynyń apparatyna qaıta aýysyp, Áleýmettik-mádenı damý jáne ǵylym komıtetimen ózara is-qımyl bóliminiń meńgerýshisi qyzmetin atqardy.

2017 jyldan 2019 jylǵa deıin Senat apparaty basshysynyń orynbasary boldy.

2019-2022 jyldary Senat apparatynyń Halyqaralyq qatynastar, qorǵanys jáne qaýipsizdik komıtetimen ózara is-qımyl jónindegi bólimdi basqardy.

2023 jyldyń 1 qańtarynan bastap Konstıtýtsııalyq Sottyń sýdıasy bolyp jumys istedi.

Aıta keteıik, Memleket basshysynyń Jarlyǵymen Azamat Nesipbaıuly Esqaraev Qazaqstan Respýblıkasynyń Ádilet mınıstri laýazymynan bosatyldy.