Erlan Saırov jataqhanasyz júrgen stýdentterdi Áýezov shyǵarmasyndaǵy «qorǵansyzdarǵa» teńedi

ASTANA. QazAqparat – Muhtar Áýezovtiń osydan bir ǵasyr buryn jazyp ketken «Qorǵansyzdyń kúni» áńgimesindegi problema áli ózekti. Májilis depýtaty Erlan Saırov «Amanat» atynan saılanǵan máslıhat depýtattarynyń respýblıkalyq forýmynda osyndaı pikir aıtty, dep habarlaıdy QazAqparat tilshisi.

«Uly Muhtar Áýezov 1921 jyly «Qorǵansyzdyń kúni» áńgimesin jazyp, qazaq prozasynda sol kezeńdegi ózimizdiń keıbir «aǵalarymyzdyń» jas jetkinshekterge álimjettiligi jóninde jazsa, bizdiń jastarymyz HHІ ǵasyrdyń 20-jyldary da «qorǵansyzdyń kúnin» keship otyr!

Elimizdiń joǵarǵy, orta oqý oryndarynda stýdent, oqýshylardyń – siz ben bizdiń balalarymyzdyń jatahana, oqý korpýsterin baı-baǵlandar uıalmaı- qyzarmaı tartyp alǵan», - degen depýtat Almaty Agrarlyq ýnıversıtetindegi jaǵdaıdy «masqara» dep atady.

«Balańdy tárbıeleme, ózińdi tárbıele» deıdi, óıtkeni balań seniń aıtqanyńdy emes, istegenińdi isteıdi! Sonda biz jetkinshek urpaqqa qandaı tárbıe berip otyrmyz? Sondyqtan, Ulttyq quryltaıda Prezıdent Q. Toqaev ulttyq tárbıe máselesin kóterdi. Qazaq «Ne ekseń, sony orasyń» deıdi. Bolashaq urpaq ulaǵatty, parasatty bolsyn desek, biz eresekter, adamshylyq bet-beınemizdi saqtaı bilýimiz kerek. «AMANAT» partııasynyń depýtattary ózderiniń ıgi isterimen, ulaǵatty oılarymen, naqty qadamdarymen halyqqa úlgi bolyp, jańa turpattaǵy saıası mádenıetti qalyptastyrýdyń etalonyna aınalýy kerek», - dedi Májilis depýtaty.