Erlan Saırov: Zańsyz aktıvterdi qaıtarý týraly qujat – qoǵamnyń áleýmettik ádilettilikke degen suranysyna jaýap

ASTANA. QazAqparat – Zańsyz ıemdelgen aktıvterdi memleketke qaıtarý týraly Zańnyń qabyldanýy qoǵamnyń áleýmettik jáne moraldyq ádilettilikke degen jappaı suranysyna laıyqty jaýap boldy. Osyndaı pikirin QR Parlamenti Májilisiniń depýtaty Erlan Saırov aıtty, dep habarlaıdy QazAqparat tilshisi.

«Bul zań - elimizde áleýmettik ádilettilikti qurýdyń óte mańyzdy tetigi, óıtkeni 30 jyl ishinde elde, árıne, ekonomıkalyq reformalar júrgizilip, belgili bir damý boldy. Biraq elimizdiń azamattary men rezıdent emes azamattardyń óte shekteýli bóligi Qazaqstannyń ulttyq baılyǵynyń negizgi bóligin ıemdengenin joqqa shyǵara almaımyz. Prezıdent Qasym-Jomart Toqaev tek 162 adam - elimizdiń eń baı adamdary ekenin jáne Qazaqstannyń jalpy ishki óniminiń jartysynan astamyn ıelenetinin atap ótkeni este shyǵar. Sondyqtan erte me, kesh pe, áleýmettik ádilettilik ornaýy kerek jáne bul zań zańsyz satyp alynǵan aktıvterdi birtindep evolıýtsııalyq qaıtarý mehanızmi bolyp tabylady», - dedi Májilis depýtaty telefon arqyly áńgimeleskende bergen túsindirmesinde.
Onyń aıtýynsha, zań óte mańyzdy ári qajet. Eń bastysy qujatta zańsyz satyp alynǵan aktıvterdi qaıtarýdyń naqty mehanızmi bar.
«Eger memleket bul aktıvtiń zańsyz satyp alynǵanyn dáleldese, ony alyp qoıýǵa bolady. Sondyqtan bul zań turǵysynan óte mańyzdy. Naqty zańdy mehanızm bar. Meniń oıymsha, bul zań qajet. Bul el halqynyń úlken bóliginiń tilegi. Biz aımaqtarǵa barǵan kezimizde kóptegen turǵyndar keıbir adamdardyń «kóleńkeli» jolmen tabylǵan aktıvteri bar ekenin, olardyń qashan qaıtarylatynyn surady. Bul qoǵamnyń áleýmettik jáne adamgershilik ádilettilikke qatysty týyndaǵan jappaı suraǵyna jaýap dep oaılaımyn», - dep tolyqtyrdy Erlan Saırov.
Eske sala keteıik, keshe Memleket basshysy zańsyz ıemdelgen aktıvterdi memleketke qaıtarý týraly zańǵa qol qoıdy.