Erlan Saırov: Túrki elderi ishinde Túrkistannyń rýhanı róli odan saıyn artatyn bolady
ASTANA. QazAqparat - Ońtústik Qazaqstan oblysynyń ortalyǵyn Túrkistanǵa kóshirý - ýaqtyly ári ózekti sheshim. Áleýmettanýshy ári saıasattanýshy, QR Kásipodaqtar federatsııasy tóraǵasynyń orynbasary Erlan Saırov QazAqparat tilshisine osylaı pikir bildirdi, dep habarlaıdy QazAqparat tilshisi.
«Búgingi tańda burynǵy Ońtústik Qazaqstan oblysynda 3 mıllıonnan astam halyq turady. Ózderińiz biletindeı, Ońtústik Qazaqstan - elimizde halyqtyń sany jaǵynan eń joǵarǵy oblys bolatyn. Sondyqtan, oblys ortalyǵyn Túrkistanǵa kóshirip, onyń atyn ózgertý óte ózekti ári ýaqtyly sheshim dep aıtar edim. Óıtkeni, Qazaqstanda qazir halqy 1 mıllıonnan astam qalalar az. Sonyń biri - Shymkent. Bul (oblys ortalyǵyn kóshirý týraly sheshim - avt.) bizdiń Qazaqstannyń áleýmettik-ekonomıkalyq damýyna óte úlken kómek bolary aıqyn», - deıdi Erlan Saırov.
Áleýmettanýshynyń aıtýynsha, eldiń áleýmettik-ekonomıkalyq damýyn ary qaraı jalǵastyrý úshin aımaqtar men damý ortalyqtary kerek.
«Shymkent - búgingi tańda Ortalyq Azııa elderimen saýda qarym-qatynasynyń úlken bir forposty. Shymkent qarjylyq ortalyq bola otyryp, úlken megapolıs retinde Qazaqstannyń damýyna úlken úlesin qosa alady. Al endi Túrkistandy oblys ortalyǵy etýdiń ózindik mańyzy bar. Túrkistan búkil túrki halyqtary úshin rýhanı róli erekshe ekendigi belgili. Sondyqtan, atalǵan sheshimmen birge Túrkistan úshin Qazaqstan tarıhynda damýdyń jańa paraǵy ashylary daýsyz. Óıtkeni, ol - birinshiden qarjy ınvestıtsııasy. Ekinshiden, adam ınvestıtsııasy. Úshinshiden árıne, bul qalanyń Qazaqstanǵa ǵana emes, túrki elderi ishindegi rýhanı róli odan saıyn arta beretin bolady. Sondyqtan qoǵam bul sheshimdi mindetti túrde qoldaıdy», - dedi Erlan Saırov.
Eske sala ketsek, búgin Elbasy Nursultan Nazarbaev Shymkent qalasyna respýblıkalyq mańyzy bar qala mártebesin berý jáne oblys ortalyǵyn Túrkistan qalasyna kóshirý týraly Jarlyqqa qol qoıǵan bolatyn.
«Búgin «Qazaqstan Respýblıkasynyń Ákimshilik-aýmaqtyq qurylys týraly» Zańynyń toǵyzynshy babyna sáıkes, Shymkent qalasyna respýblıkalyq mańyzy bar qala mártebesin berý jáne oblys ortalyǵyn Túrkistan qalasyna kóshirý týraly Jarlyqqa qol qoıǵaly otyrmyn. Budan bylaı bul óńir Túrkistan oblysy dep atalatyn bolady. Osy ákimshilik aýmaqtyń qurylymyna ózgeris engizý arqyly bul óńirdiń órkendeýine tyń serpin berýdi kózdegen tarıhı qujat bolyp sanalady», - dep atap ótti Memleket basshysy.
