Erlan Saırov: Talaı ǵulamalardyń deńgeıine jetetin jastardy tárbıeleıtinimiz anyq
«Bilimniń, ǵylymnyń qaınar bulaǵy shyǵysta bolǵan. Búgingi adamzattyń ıgiligin jasap jatqan ǵylym baǵyttary shyǵys órkenıetinen taraǵanyn bireý bilse, bireý bilmeıdi. Búgingi algebra, medıtsına, astronomııa, geografııa, poezııa shyǵystan tamyr ala otyryp, búkil adamzattyń damýyna áser etti. Osy zamanda dúnıejúziniń damýy shyǵystyń damýy boldy. Birtindep, zaman óte, batystyń kúni ońynan týyp, mádenıet, ǵylym, rýhanııat batysqa aýysty. Biraq, batys shyǵystyń adamzat damýyna qosqan úlesin elemeıtin jaǵdaıǵa jetti. Osydan órkenıet teketiresi, eki mádenıettiń daýy bastaldy», - deıdi áleýmettanýshy.
Erlan Saırovtyń aıtýynsha, batys órkenıeti ǵylymdy, tehnologııalardy, noý-haýdy damyta otyryp, tizgindi áli ustap keledi. Sol mádenıetti, áleýmettik tehnologııalardy jappaı úırenýdiń bir ǵana joly - osy ǵylymnyń bizdiń urpaqtar úshin qoljetimdi bolýy.
«Rýhanı jańǵyrý» baǵdarlamasyna sáıkes, dúnıejúzi boıynsha ǵylymı jaýhar bolyp tabylatyn eńbekter aǵylshyn tilinen tikeleı qazaq tiline aýdarylyp, oqý oryndaryna jol tartty. Bul qadam - bizden keıingi urpaqqa dúnıejúziniń ǵylymı teorııasy men praktıkasynyń baǵytyn bilip, zerttep, baǵdarlaý úshin óte úlken úles. Dj. Rıttserdiń «Áleýmettaný teorııasy», Gregorı Menkıýdiń «Ekonomıks», Rıkkı Grıffınniń «Menedjment», Karen Armstrongtyń «Qudaıdyń tarıhy» kitaptary bizdiń jastarǵa ǵana emes, ózimiz qyzyǵyp oqıtyn, dúnıetanymymyzdy ózgertýge qabiletti týyndylar bolyp tabylady», - deıdi ol.
Áleýmettanýshynyń oı-paıymyna sáıkes, bolashaq urpaq basqa elderdegi óz qatarlastarynan qalys qalmaýy úshin osynaý bilim bulaǵynan sýsyndasa, ultymyz talaı ǵulamalardyń deńgeıine jetetin jastardy tárbıeleıtindigi anyq.
«Elbasy Nursultan Nazarbaev «biz bala kezimizde osynaý týyndylardy bilgen de joqpyz. Jas urpaqqa bul týyndylar ult bolashaǵyna shamshyraq bolatyndyǵy anyq» dedi. Kezinde, Alash ardaqtylaryna taǵylǵan negizgi aıyp - «olar japon shpıondary bolǵan». Shyndyǵynda, alashshyldar bizdiń urpaqtyń japon tehnologııasyn ıgere otyryp, zaman bıigine shyǵýyn armandaǵan. Endi, bizden keıingi urpaqqa álem deńgeıindegi ıntellektýaldyq mektepterdiń bilimin ıgerýge múmkindik týyp otyr. «Rýhanı jańǵyrý» baǵdarlamasynyń birden-bir qorytyndysy osynaý tendentsııa bolary anyq», - deıdi Erlan Saırov.
Onyń aıtýnysha, Qazaqstandaǵy jas urpaqtan óz zamanynyń Feıerbahy, Nıtsshesi, Mahatma Gandıi, bıznes salasynda Tsýkerberg, Djobs, Shvaby shyǵyp jatsa, ultymyzdyń bolashaǵy aq-jarqyn deýge barlyq negiz bar.
«Jańa tarıhı tsıklǵa bizdiń jetkinshek urpaq daıyn ba? Tórtinshi ónerkásiptik revolıýtsııa kezeńinde qazaq sotsıýmy ózin qalaı sezinedi? Daıyndyq osyndaı naqty is-sharadan bastalýy kerek», - deıdi áleýmettanýshy.
Eske sala ketsek, keshe Astanadaǵy Nazarbaev ortalyǵynda keshe «Qazaq tilindegi 100 jańa oqýlyq» jobasy aıasynda aýdarylǵan alǵashqy kitaptardyń tanystyrylymy ótken bolatyn. Joba sheńberinde bıyl taǵy 30 kitap qazaq tiline aýdarylatyn bolady.
