Erlan Saırov: Saıası turaqtylyq – basty qundylyq

ÓSKEMEN. QazAqparat – Óskemen qalasynda ótken «Saılaý-2021: mańyzy men erekshelikteri» atty sarapshylar keńesiniń otyrysynda Eýrazııalyq ıntegratsııa ınstıtýtynyń dırektory Erlan Saırov azamattardyń saıası belsendiligin arttyrý kerektigin málimdedi, dep habarlaıdy QazAqparat tilshisi.

«Búgingi tańda el halqynyń demokratııaǵa degen suranysy joǵary. Al barlyq saıası protsester osy suranysqa jaýap berý maqsatynda qolǵa alynýda. Aldymyzda Parlament Májilisi depýtattarynyń kezekti saılaýy kele jatyr. Bul qoǵamdaǵy áleýmettik máselelerdi kóteretin jańa lıderlerdi irikteýdiń múmkindigi. Osy oraıda azamattardyń saıası belsendiligin arttyrý kerek. Qazaqstan turaqsyz álemdegi turaqty memleketterdiń biri. Mine, biz osyny saqtaýymyz qajet. Saıası turaqtylyq – basty qundylyq», - dedi Erlan Saırov.

Onyń aıtýynsha, QR Prezıdenti Qasym-Jomart Toqaevtyń bastamasymen qoǵam suranystaryna oraı zańǵa birshama ózgerister engizilip, talaı ıgi sharalar qolǵa alynýda.

«Bul rette «Halyq únine qulaq asatyn memleket» tujyrymdamasyna saı keletin mıtıng týraly zańdy aıtýǵa bolady. Al saılaý týraly jańa zańnyń nátıjesinde partııa tiziminde áıelder men jastarǵa 30 paıyzdyq kvota berilgendigi belgili. Búkil álemdi qyspaqqa alǵan koronavırýs pandemııasyna qaramastan elimizde áleýmettik salaǵa basa mán berilýde. Sońǵy 4 jylda Qazaqstanda 3 myńnan astam balabaqsha, 2 myńnan astam mektep salynǵan. Osyndaı ońdy ózgeristerdiń arqasynda halyqtyń bılikke degen senimi artyp keledi», - dedi Eýrazııalyq ıntegratsııa ınstıtýtynyń dırektory.

Óz sózinde ol jurtshylyqty Parlament Májilisi depýtattarynyń saılaýyna belsendi qatysýǵa shaqyrdy.